Analisis: Silencio hermetico riba caso di asesinato no ta funciona mas

Skirbi pa Tito Laclé 

Siman nobo ta habri Aruba ainda den shock pa e descubrimento den fin di siman, di e caso unda cu a haya un curpa mutila den un freezer den un cas. Mientras cu varios media a publica varios detaye personal di e victima, autoridad local si tin un silencio hermetico riba e caso aki, fuera di raporta cu tin 'algo' cu a sosode, y cu no por divulga mucho mas. Berdad cu algo ta miho cu nada, pero, awendia, esaki no ta suficiente. Ta conoci cu den un caso asina, berdad no por a duna hopi informacion pa no daña e investigacion. Pero mientrastanto, personanan a papia, y comparti informacion cu ta pone cu e detayenan a bira ‘un secreto publico’.  Laga mi splica kico mi kier men. 

CULTURA TA STROBA 

E cultura di nos ta cu hopi cos den un situacion asina, unda cu ta tapa tur cos cu e ‘pretexto’ cu ‘no por daña e investigacion’ ya no ta funciona mas. Por lo menos un conferencia di prensa, cu e informacion cu a sali caba, ta lo minimo cu por a haci. Atrobe, e practica di ‘antes’ ta tcomprendibel, pero ya casi no practico mas awendia. Un otro cultura ‘taboo’ ta cu ‘no ta usual cu ta acerca e famia en cuestion pa informacion, manera ta normal na otro paisnan’. Aki, e cultura y custumber ta cu ‘no ta stroba e famia’, y ta laga nan ‘den trankilidad’. Sinembargo awendia cu e forma agresivo cu tin di informacion, via tambe rednan social, esaki ta casi un problema awor. Otro partinan, famianan mes ta pidi pa papia, pa asina por ‘procesa nan dolor’, y asina ta maneha nan situacion. 

Mescos cu e ‘taboo’ manera simplemente puntra un hende pa su edad, cu ta wordo considera como un ‘falta di respet’. Algo cu no ta haci aki, pero cu otro parti di mundo ta normal.

Tempo cu mi a cubri mi prome caso internacional como representante local pa Associated Press (AP), localmente, e secuestro di e hoben (e tempo ey) Ferrara, y su Libertad, a siñami conoce hopi aspecto internacional di cubri un noticia asina. Detayenan cu pa nos ta‘'taboo’, pero cu internacionalmente ta normal y ta lidera e storia. Ta berdad cu no ta pasobra cierto culturanan cierto cosnan ta possible, cu automaticamente e mester bira normal pa nos tambe. Pero den cierto casonan, comparti informacion por te hasta yuda e caso. Pa horibel cu e caso por ta, no ta kita afo cu mester comparti informacion pa por compronde kico a sosode. Nos lo keda pendiente, y wak con e caso aki ta desaroya.