OM: Pendiente pa haci autopsia riba curpa di venezolano ‘illegal’

ORANJESTAD – Landsrecherche a cuminsa un investigacion pa haya sa e circumstancia di e morto di e persona haya morto den un cel na Huis van Bewaring na Dakota. Y ta mas sigur cu pa mayan e autopsia lo tuma lugar. Asina vocero di ministerio publico, Ann Angela a confirma na NoticiaCla.com awe mainta. E por a confirma cu e autopsia di e persona no a tuma lugar ainda. Mientrastanto e morto di e venezolano indocumenta, ta keda un misterio.

IDENTIFICA

E persona mientrastanto a keda identifica como Jose Gregorio Javier Bullones,(25) naci na Venezuela. Mientras cu e la keda deteni pasobra e lo ta un ‘illegal’, oficialmente rapport di polis (publica awe) ta bisa cu e persona a bin Aruba dia 2 di augustus, ‘di vacacion’. Pues e motibo di su detencion relaciona cu ilegalidad tambe ta den investigacion.

MELDING

Manera ta conoci, ayera polis a haya notificacion di personal di warda nos costa, cu na HvB lo tin ‘un sospechoso lo a muri den un cel’. Na yegada polis enberdad a tuma nota cu e persona no tabata duna señal di bida mas. Mesora a avisa ambulance y demas autoridad manera recherche, BFTO, Officier van Justitie. Docter Lin ta esun cu merdia a oficialmente constata su morto