Wever: Tur partido mester claridad y ta di acuerdo riba e contenido y impacto di e ley di spearfishing

ORANJESTAD  – Minister di Sector Primario, mr. Geoffrey Wever, a tene un reunion informativo cu e comision cu tabata den dialogo cu Santa Rosa referente e ley di “Spearfishing” (piscamento cu Harpoen). Durante e reunion a intercambia opinion y pensamento y tambe a ricibi clarificacion tocante e proceso di formulacion di e ley. E miembronan presente tabata señor Edward Dirks, señor Marving Thiel y señora Abi Kock, hunto cu representantenan di Santa Rosa.

Minister Wever a expresa su aprecio pa e dialogo constructivo y a enfatisa cu ta importante pa ambos partido haya claridad y pa ta di acuerdo riba e contenido y impacto di e ley. Minister Wever a pidi e representantenan dos siman di tempo adicional pa profundisa su mes y a compromete pa reuni bek cu e comision den dos siman pa sigui e dialogo.

E reunion aki ta forma parti di e proceso pa stimula dialogo continuo cu stakeholdernan den e sector primario y pa transforma e sector primario den uno resistente y robusto. Tur esaki por medio di evalua y si ta necesario adapta e leynan relaciona cu agricultura, cria y pesca, manera cu a keda acorda den e Programa di Gobernacion AVP-FUTURO 2025-2028.