Caluroso bon bini pa atletanan di Special Olympics

ORANJESTAD -  "Ta pa mi un placer pa ta un di e promenan pa yama boso cada un bonbini bek na Aruba, den nomber di tur nos empleadonan aki na Aeropuerto," asina James Fazio, CEO di AAA a bisa na yegada di e delegacion di Aruba cu a participa na e "Special Olympics World Games - Los Angeles 2015". Nan a yega Aruba cu varios medaya di brons, plata y oro colga rond di nan garganta. AAA ta masha orguyoso di por ta e promenan pa saluda e atletanan y yama nan pabien cu tur nan logronan.Team Aruba a yega cas cu un total di 48 medaya: 12 oro, 16 plata y 20 brons, como tambe varios reconocimento pa nan prestacionnan. E 26 atletanan di Aruba a competi na e deportenan di bowling, landamento, futbol, “track & field”, bolas criollas y badminton. Tabatin mas di 7000 atleta participando na e World Games y Aruba a logra e di prome luga entre tur e delegacionnan di Caribe.

AAA ta por lo menos un di e patrocinadonan cu a sostene e biahe aki nos atletanan. Como compania, e vision di AAA no ta solamente pa percura pa pasaheronan yega y sali for di nos isla cu avion, sino tambe pa ta un bon ciudadano corporativo. Den esaki ta sostene e organisacion, pero tambe tin empleado special den servicio, cu ta un forma directo pa brinda oportunidad na ciudadanonan special di nos isla. James Fazio a bisa den su discurso cortico cu e atletanan a practica duro y a competi cu pasion y energia positivo pa cumpli nan metanan y realisa nan soño. Y cu e logro aki no ta solamente importante pa e atletanan so, sino tambe pa tur nan coachnan, lidernan di grupo y nan sernan keri. E director di AAA a felicita e atletanan un pa un na nan nomber, esta Jhorzy, Vanessa, Philippe, Chloe, Francis, Junior, Sharman, Angel, Rashely, Mirianne, Audrid, Dairylis, Darling, Jose, Ferlidion, Jo-Ann, Eldrick, Josbiel, Michel, Christiaan, Lee-wald, Rafael, Jordan, Giontrick, Jeremiah y Reegel.