Trump ainda no a tuma ningun desicion tocante un atake riba Venezuela

WASHINGTON – E presidente di Merca, Donald Trump, ainda no a dicidi si el lo manda haci atakenan militar riba teritorio di Venezuela. CNN y Reuters ta reporta esaki basando riba fuentenan den gobierno di Merca. Segun e fuentenan, tin un serie di opcionan militar cla, pero Cas Blanco ta laga habri e posibilidad pa no ordena niun atake. For di e informacion parce cu Trump siman pasa a wordo actualisa tocante posible meta, for di instalacionan militar te cu edificionan di gobierno den Venezuela. Na mesun tempo, conocedonan ta enfatiza cu diplomacia ainda no a bay total for di mesa. Trump mes a sugeri cu Caracas “ke papia”, apesar cu prome a parse cu negosacionan no tabata duna resultado.

TROOP BUILDUP

E inseguridad tocante un posible atake ta yega na un momento cu Merca a crea un aumento considerabel di tropa den region Caribense. Entre otro, e portavion USS Gerald Ford a wordo manda pa region pa pone presion riba presidente Nicolas Maduro, cu Merca ta bisa cu e  ta lider di un “cartel di droga terrorista”. Segun funcionario di Merca, e meta di e presencia militar ta principalmente pa intimidacion. Nan ta enfatiza cu e movimiento no ta nifica automatico cu atakenan lo tuma luga. Na Washington tambe tin un debate tocante e base huridico pa cualkier operacion posibel: den Senado recientemente un resolucion a cay, esun cu tabata mester preveni cu e presidente actua militarmente sin permiso di Congreso. Pa paisnan den region Caribense, inclui e Reino di Hulanda cu su provisionnan militar y logistic na Aruba y Corsou, e mensahe for di Washington ta cla: Merca ta mantene preshon riba Maduro, pero un atake real ainda no a wordo dicidi.