Corsou ta ricibi su heroenan di futbol awe atardi

WILLEMSTAD – E seleccion nacional di futbol di Corsou lo wordo ricibi awe atardi cu un parada grandi di victoria y un programa di fiesta riba e isla. E team lo yega rond di merdia na Hato Airport. E parada di victoria, organiza door di gobierno di Corsou, ta cuminza tres or awe atardi na e aeropuerto. E team lo pasa den diferente bario di Willemstad prome nan yega rond cincoor atardi na Waaigat, unda un programa di fiesta amplio ta warda nan.

PROGRAMA  AMPLIO DI FIESTA  

Na Waaigat, cuatoror atardi ta cuminza e pre show cu DJ Argenis Huerta, sigui cincoor cu Grupo Oriri. E programa oficial ta cuminza seis or anochi cu apertura door di pastor Pedro Manuel Duarte, despues lo canta himno nacional di Corsou. Aemy “NiaFeliz” ta presenta “Goodness of God”. Minister di Educacion, Ciencia, Cultura y Deporte, Sithree van Heydoorn, ta papia. Cinco minut  despues ta sigui premier Gilmar Pisas. Tambe directiva di Federacion di Futbol di Corsou y e staff technico lo hiba palabra. Amos Balentin ta presenta “We Are Curacao”. E team nacional lo wordo homenagea. Jeon ta presenta cu “Blue Wave”, sigui cu ICONS. Supporternan ta wordo yama pa sali den cantidad grandi banda di ruta y na Waaigat pa aclama e team nacional y mustra nan sosten pa seleccion.