ANALISIS: Parlamentario ta usa reunion publico pa critica un tema personal

Skirbi pa Tito Laclé 

E aña aki un biaha mas e debate riba e yegada di Sinterklaas y su pietnan a causa e consternacion conoci, esta pakico awe ainda ta ‘tolera’ cu e pietnan ta ‘preto’ y no ‘multicolor’. Un discusion cu algun aña pasa a lanta cabez prome na Hulanda y a transporta su mes pa Aruba tambe. Si semper e fiesta a permiti y tolera e pietnan pa ta ‘preto’, awe un grupo di persona ta mustra nan malcontento cu esaki, alegando cu ta ‘discriminacion’ contra e rasa di color. Tabata durante gabinete anterior cu a dicidi di trece cambio den esaki, menguando e diferencianan den comunidad. 

E aña aki tin cambio di gobierno, y  un biaha mas e pietnan a yega ‘preto’, causando problema. Sigur ora cu por lo menos un parlamentario di color, di e partido na mando pa colmo, a reacciona durante un reunion publico, cu no tin nada di haber cu e tema, pa mustra su disgusto. Esaki sinembargo tabata suficiente pa e partido cu awor ta den oposicion, subi e cabay aki y ‘mustra sosten’, na e causa di e parlamentario di partido opuesto.

OTAMI

Tabata durante tratamento di cuenta anual 2019 den Parlamento, cu no tin nada di haber cu e tema di ‘Zwarte Piet’,  Parlamentario di AVP Otami Thomasia a critica e yegada di Sinterklaas diadomingo ultimo. Usando e palabranan di e comunicado di MEP “El a cuminsa bisa cu e celebracion di “zwarte piet” ta un ofensa pa un grupo den nos comunidad, cu ta sinti nan discrimina. Parlamentario Thomasia ‘strategicamente’ reconoce e esfuersonan cu ex minister di cultura Xiomara Maduro a bin ta haciendo desde 2022, di respeta e sentimentonan di e gruponan den comunidad, y a haci e celebracion di Sinterklaas algo bunita, cu pietnan colorido. Hasta a cambia e letranan di e canticanan pa asina segura cu ta un celebracion cu ta inclui tur hende’. E partido a probecha di ataca e lider di e persona (premier Mike Eman) cu a critica (esta Otami), y cu e la falta respet pa comunidad. A te hasta usa e tema di racismo y discriminacion pa mustra nan malcontento. Cu esaki, politica ta bolbe subi un tereno cu ta hopi sensitivo den comunidad. Y mirando cu ta politica, no a basila pa usa esaki pa ataca otro politicamente, pa un tema cu no tin nada di haber politicamente. 

Awendia cu social media, tur hende tin un voz, uno mas fuerte cu otro. Y cu esaki ta bin un responsabilidad of falta di dje, cu ta conduci solamente na mas fragmentacion y polarisacion den comunidad. E pensamento di cu no tur cos cu antes tabata funciona, ta funciona awe automaticamente, ta sigui bin dilanti. Ta tarea di gobierno pa resolve e asunto aki of no? Gobierno anterior a purba ‘mengua cos’ y mientras cu no tur hende tabata di acuerdo, e cos a mane ‘muri’ un poco. Pero ata cos a bolbe lanta cabez, pasobra un politico nobo, a dicidi di protesta y lanta tur cacho for di soño atrobe. E pregunta ta, si e señora aki no a papia nada, si cos lo a keda keto? Y si e señora tabata corecto pa atende cu e asunto aki durante un reunion publico riba presupuesto di un instancia cu no tin nada di haber cu e fiesta en cuestion? 

E punto ta, mester stop di usa reunionan publico, riba un tema specifico, pa trece cosnan dilanti cu no tin NADA di haber cu e tema al caso. No usa e reunion, como un plataforma pa papia bo disgusto personal, y usa e tempo mas util pa trece e temanan alcaso. Porta ta un fayo di nobato? Tempo lo bisa.