Na Corsou, Corte a sentencia ex parlamentario na castigo di prizon pa asunto di droga

WILLEMSTAD - Den un sentensia di 40 página, korte a kondena e èks parlamentario i lider di partido polítiko di KEM, Michelangelo “Lo” Martines na 7 aña di prizòn ayera. Esaki ta 1 aña ménos di loke fiskal a demandá pa Martines. E echo ku korte no a kondená Martines na 8 aña manera fiskal a pidi ta pasobra vários di e akusashonnan a keda probá por parti, i no kompletamente. Na momentu ku Martines a tende e sentensia ayera, el lanta benta stul abou, i a indiká na wes ku e ta bai den apelashon ku e sentensia di ayera.

Wes a dikta ku Martines ta kulpabel di kuater transporte di droga, komo tambe preparashon di e transporte di droganan. E transportenan lo mester a tuma lugá den paisnan Kòrsou, Panamá, Bèlgika, Hulanda, Fransia i Spaña. E di sinku akusashon probá ta di labamentu di plaka, alrededor di 2 mion florin. E echonan aki mester a tuma lugá den e periodo di 2019-2024.

Di akuerdo ku wes, e ta mira e ròl di Martines komo unu di organisadó i koordinadó di e transportenan di droga, i ta masha importante.

Martines a hasi su mes kulpabel na labamentu di sumanan di plaka, miéntras e tabata sa di unda e sèn tabata bini, esta di krímen. E forma di laba plaka akí, ta forma un menasa pa e ekonomia legal i ta mishi ku integridat di un tráfiko finansiero i ekonómiko. Segun e puntonan di orientashon pa wes yega na un kondena pa labamentu di plaka den e kaso aki mas di 2 mion florin, tin un kastigu di prizòn di 24 luna.

Manera ariba indiká, wes a haña probá ku konhuntamente ku otronan a transportá 20 kilo di koka di Panamá pa Hulanda. E transporte aki a bai via di un mula di fam Lak. Tambe huntu ku otro personanan, den sinku otro kaso separá a hasi preparashon di transporte di kokaina. Ta trata aki kada biaha pa un kantidat di droga ku tabata destiná pa keda distribuí, i bende. Tambe wes a para ketu ku kokaina ta dañino pa salú di hende. NOTA: Texto ta scirbi den papiamento fonetico di Corsou. Por lesa e sentencia AKI.