SMOA a perde caso contra gobierno di Aruba

ORANJESTAD - Stichting Middelbaar Onderwijs Aruba (SMOA) a perde su caso contra gobierno di Aruba awe, riba e caso pa para gobierno di aplica criteria 'nobo' pa laga studiantenan di MAVO drenta HAVO proximamente. E sentencia tabata poni pa 21 di augustus, pero huez a dicta e sentencia awe caba. Den e sentencia huez a rechasa e peticion di gobierno, pa anula e MB di 8 di juli cu ta determina e criteria ‘nobo’ pa alumnonan di MAVO por drenta HAVO.

URGENCIA

SMOA a argumenta cu e tin urgencia cu e caso, mirando cu den e MB di 8 di juli di gobierno, no tin un fase transitorio, y ta aplicabel caba pa 17 di augustus di e aña aki. Ademas e inscripcion pa Colegio, ya ta sera caba y no tin mas lugar. Gobierno a argumenta cu esaki no ta berdad, pasobra e criteria nan cu e ta uza, ta e mesun nan di e aña escolar anterior y no esun cu awor SMOA a cambia unilateral mente. Riba pregunta di huez, a resulta cu posiblemente 50 alumno no por drenta scol awor cu tin e reglanan ‘mas skerpi’ manera cu SMOA a implementa pa e aña escolar nobo.

DERECHO

SMOA a sigui mustra cu nan tin e derecho segun LB dagscholen mavo, havo y vwo, pa determina ken ta drenta scol of no. Corte sinembargo ta di opinion si e pregunta ta si nan por haci uso di e ley aki, of tin cu basa nan mes riba e hecho cu nan por dicidi, ken por drenta a base di e criterionan stipula, of si nan tin e derecho tambe pa cambia e criterionan aki. Mirando tur e puntonan aki, huez a rechasa e puntonan aki y a duna gobierno gana. SMOA awor tin cu bay bringa e caso den un ‘bodemprocedura’ proximamente. "E interes di nos studiantenan a pisa mas cu cualkier interes di un directiva di scol", tabata e reaccion breve di minister di enseñansa Michelle Hooyboer, na NoticiaCla.com. No a logra haya e reaccion di parti di directiva di SMOA, aunke intento a wordo haci. Wak e sentencia aki (pag1, pag2, pag3, pag4)