Wever: Mester a haci un excepcion pa Royal Schiphol Group cu e LNT pa por a firma

ORANJESTAD – Pa por a logra cera un acuerdo cu Royal Schiphol Group pa nan sigui maneha e aeropuerto di Aruba, gobierno mester a bay di acuerdo y desvia di e ley di LNT ( e ley cu ta regula cu cierto compania nan hefe no por gana mas cu e salario di prome minister di Aruba). Asina minister di finanza Geoffrey Wever a confirma pa Noticiacla dialuna mainta. Mientras cu gobierno no a firma e contract mes cu RSG si ainda, a firma e landsbesluit si cu ta haci e ‘excepcion’ aki posibel. E mandatario a splica tambe cu e otro aspetonan mas detaya di e acuerdo cu RSG, ta na encargo di coleganan minister Mike Eman y Wendrick Cicilia. 

MAS COMPANIA

Segun Wever, e cos no ta keda aki, pasobra fuera di RSG (cu tabatin un problema cu e LNT), tin entre 12 pa 15 otro compania cu ta bringando Gobierno den corte actualmente riba e tema. E mandatario a bisa e portal aki tambe cu desde mitar di september ultimo, e la manda instruccion pa DWJZ pa un revision di e ley en cuestion.  Y segun Wever, e revision di e ley aki tabata un punto tambe riba e programa di gobernacion di e partido FUTURO, di cual Wever ta pertenece na dje awor. Specificamente, cu lo ‘evalua e efectonan di e Landsverordening Normering Topinkomen (LNT) pa posibel adaptacion cu ta evita cu nos profesionalnan ta bay for di Aruba of no kier bin traha na Aruba’. E minister no a confirma con y ki tempo lo bay revisa e ley aki, pero si cu nan ta ‘trahando’ riba dje. 

RSG

Den fin di siman tabatin hopi critica contra e hecho cu gobierno a haci excepcion y permiti pa un solo persona gana mas cu un miyon florin pa aña (e hefe di RSG na Aruba cu lo maneha aeropuerto), siendo cu tin otro companianan y asuntonan cu merece e placa aki mas urgente. Ademas, ta alega cu ta prefera paga un stranhero e placa aki envez di un Arubiano. 

FAZIO

Tabata durante un entrevista exclusivo recientemente cu Noticiacla a tene cu e director interino actual di aeropuerto Jamez Fazio, cu a confirma cu sin e excepcion di LNT, RSG lo no por haya un candidato adecua pa maneha aeropuerto, y lo no firma un persona e ora. Ademas a confirma cu no a pone un hende local, pasobra RSG simplemente ‘no ta promove’ internamente, sin cu e persona tin un experiencia internacional. A compronde cu lo a duna un di e ex hefenan e oportunidad pa bay afo y gara experiencia aki, pero cu e persona no lo a acepta esaki e tempo ey. Y pesey no por promove un hende localmente, ‘ainda’.