Barconan mericano ta sigui navega cerca di costa Venezolano

CARACAS – Dos barco di guerra di Merca a wordu mira den weekend, rond di 50 kilometer for di costa di estado venezolano Falcon, den awa internacional pero den Zona Economico Exclusivo di e pais sudamericano.  Ta toca di e destructor USS Stockdale, di clase Arleigh Burke, y e crucero USS Gettysburg, di clase Ticonderoga, cu tabata haci un maniobra hunto, loke ta representa un otro señal di presion riba gobierno di Nicolas Maduro. Segun dato satelital y registro maritimo, e dos barco a navega den formacion di oeste pa oost, pasa banda di Aruba y Corsou prome cu nan a posiciona nan mes den frente di costa venezolano. Presencia simultaneo di e dos barco, equipa cu sistema di combati Aegis y capacidad avansa pa defensa aerea y ofensiva, ta wordo interpreta como parti di un despliegue militar mas amplio cu Washington a inicia den laman Caribe den september pa combati red narcoterrorista y grupo criminal transnacional. E transito, ainda cu ta completamente den regla di derecho internacional, ta pasa den un momento di tension creciente entre Merca y Venezuela, cu a subi den dia recien cu presencia di grupo di batalla di portaavion Gerald R Ford den zona.

Autoridad venezolano no a bisa nada oficialmente tocante e maniobra, mientras cu analistanan ta adverti di riesgo di un nobo escalada den un zona strategico y instabel. Diahuebs, prensa merca a informa di un otro atake contra un presunto barco di narcotrafico den Caribe, loke ta subi e cifra di muerto na 80 den e campaña antidroga polemico, segun prensa di Merca. No a specifica fecha di e atake: cadena CBS a bisa cu e barco a wordu destrui dia lunes, mientras cu New York Times a reporta cu tabata diaranson, mencionando un funcionario anonimo di Pentagono. Pentagono no a duna reaccion inmediato na peticion pa comentario.

Tambe diahuebs, presidente venezolano Nicolas Maduro a hasi un llamada publico na su colega merca Donald Trump, pidi pa paz den continente, durante un marcha di chavismo den Caracas. “No mas guerra eterno, no mas guerra injusto, no mas Libia, no mas Afganistan! Viva e paz!”, Maduro a bisa. Ora nan a puntra si el tin un mensahe pa Trump, e lider chavista a responde: “Mi mensahe ta: Yes, peace! Yes, peace!”, y el a evita referi na un posible invasion militar di Merca: “Nos ta ocupa cu pueblo, gobernando cu paz”.

Di su banda, presidente di Asamblea Nacional di Venezuela, Jorge Rodriguez, a adverti di consecuencia incalculabel di un posible guerra den Caribe. “No ta bal e dolor cu un conflicto lo crea pa tur pais den continente, incluyendo Merca,” Rodriguez a bisa na television estatal VTV. E presidente di Asamblea Nacional a acusa Washington di usa “agresion maximo” pa promote un cambio di regimen den Caracas, y el a sostene cu e meta real di operacion naval antidroga ta destabiliza un gobierno “legitimamente constitui”.

Canciyer Yvan Gil a enfatisa cu Caracas “no tin ningun disputa cu Merca”, pero cu el ta mira su pais “amenaza unilateralmente pa un pais cu ta usa su capacidad pa genera muerte y destrucion”. Segun Gil, e despliegue militar di Washington ta “un intento di invasion” y ta viola derecho internacional.

Embahador venezolano na ONU, Samuel Moncada, a anuncia cu el lo manda un carta na secretario general Antonio Guterres insistiendo pa condena explicitamente e “accion provocativo” di Merca y pidi retira inmediato di tropa merca for di Caribe. E carta ta critica “igualdad falso” entre Washington y Caracas y ta afirma derecho di Venezuela pa defensa legitimo contra un “amenaza imminente”.