Grupo Palace Resorts ta cancela dos proyecto pa Aruba

MEXICO – Grupo Palace Resorts ta cancela nan dos proyectonan pa Aruba, te proximo aviso. Despues di su inversion den proyectonan hotelero na Jamaica, cu a conoce contratiempo, a dicidi di no sigui pa e momento aki cu esun di Aruba. Asina e website reporter.mx ta raporta. Na ta menciona cu e presidente di e grupo, José Chapur Zahoul a bisa cu ‘no a logra un convenio di acuerdo cu e tabata busca, pues pa awor, lo cancela e inversionnan den e zona’.

INVERSION

E compania tabatin intencion di inverti ‘den dos propiedad factibel den e isla aki’. Nan a bishita e isla, y tene reunion di negoshacion, pero no a logra un convenio di acuerdo.

DECISION INDEPENDIENTE

E decision ta uno independiente di e problematica cu nan tabatin pa por a habri e propiedad na Jamaica, mirando tur e tardansa y incidente. Esaki ta pone cu e inversion calcula, a aumenta substancialmente, y consecuentemente tempo pa recobra e inversion. No ta descarta sinembargo, cu e dos proyectonan aki lo por tin relacion cu otro, segun e website ta sigui raporta.

NO TA ISLA DE ORO

Inicialmente a kere cu esaki lo ta esun similar cu e proyecto di Isla de Oro. ”Esaki no ta Isla de Oro”, e desaroyado di e proyecto local, Franz Sydow a sigura NoticiaCla.com awe mainta. “Nos grupo ta completamente dedica y ta un di esnan mas fuerte den e region” Sydow a sigui bisa.