Na Corsou Parlamento kier fiha posicion y relevancia di Statuut den Reino

WILLEMSTAD – Tur Fraccion den Parlamento, esta MFK, PNP, PAR y MAN-PIN, a pidi un reunion publico pa deliberacion cu gobierno di Corsou riba su punto di bista tocante e conseho di Raad van State di oktober 2024, relaciona cu e 70 aña di Statuut di Reino. Segun e Fraccionnan, basando riba e deliberacion aki, Parlamento tambe mester fiha un posicion riba futuro di Reino.

Den nan carta, e Fraccionnan ta bisa cu recientemente tanto gobierno di Corsou como gobierno di Hulanda a publica nan punto di bista riba e conseho di Raad van State, y cu ta e intencion pa e gobiernonan di e otro paisnan den Reino tambe duna nan punto di bista riba e conseho aki. Na december 2024 a celebra e echo cu 70 aña prome, dia 15 di december 1954, Reino a uni su mes den un tratado yama Statuut di Reino, cu ta dirigi e forma den cua paisnan di Reino tin cu colabora cu otro y e relacionnan entre e paisnan aki.

Desde e tempo ey, e realidad constitucional di Reino Hulandes a cambia drasticamente, segun e Fraccionnan. “Surinam a bira independiente y a sali foi Reino na 1975, Aruba a haya Status Aparte na 1986, y desde 10 di oktober 2010 tanto Corsou como Sint Maarten tin un posicion autonomo den Reino despues cu a desmantela Antianan Hulandes. Tur esaki ta motibo pa puntra nos mes kiko ta e relevancia actual y tambe futuro di Statuut di Reino.”

PREGUNTA RIBA RELEVANCIA DI STATUUT DI REINO

Ki nificacion e Statuut aki tin den bida di nos ciudadanonan? Con e ta afecta e manera cu e paisnan di Reino ta trata y coopera punto? E Statuut ta sufisiente fleksibel pa adapta su mes na e tempo actual, y con esey lo ta den futuro? E autonomia deskribi den Statuut ta biba den practica di tur dia riba nivel di gobernacion entre e paisnan? Of e Statuut ta keda mira como un obstaculo enbes di un vehiculo pa logra metanan na fabor di e pueblonan di Reino?

Kiko di e temanan cu durante di añanan ta sigui bin dilanti, manera e deficit democratico y un areglo di disputa cu no tin fin di keda cla? Segun e Fraccionnan, tur esaki y mas ta motibo pa Parlamento deliberacion riba e tema importante aki y fiha un posicion claro.

PETICION PA REUNION Y PARTICIPACION DI EXPERTONAN

Na oktober 2024 tres miembro di Parlamento a hasi un peticion pa un reunion di Comision Sentral pa asina Parlamento por ricibi informacion technico di expertonan. E reunion aki a start na januari 2025, unda a deliberacion cu entre otro visepresidente di Raad van State, Tom de Graaf, y Staatsraad pa Corsou, Paul Comenencia. Tin varios expertonan mas cu a wordo menciona den e peticion pa e reunion, pero te awor no a logra pa scucha nan tur, sea pa motibunan logistico of pasobra nan no ta disponibel.

YAMADA PA REUNION PUBLICO ANTES DI 15 DI DECEMBER

Mirando e importancia pa Parlamento sigui cu e tema aki y forma su propio opinion, como e organo cu ta representa pueblo di Corsou, e Fraccionnan ta haña cu a yega tempo pa yama un reunion publico cu e punto di agenda: 'Deliberacion cu gobierno riba su punto di bista riba e conseho di Raad van State di oktober 2024 tocante e 70 aña di Statuut di Reino.'

E ta pidi pa invita minister presidente Gilmar Pisas na e reunion aki den representacion di gabinete Pisas III. Mirando cu dia 15 di december 2025 lo cera e aña den cua ta conmemora 70 aña di Statuut di Reino, e Fraccionnan ta pidi presidente di Parlamento pa convoca e reunion aki prome cu e fecha di 15 di december.