Di dos grupo di studiante tambe a yega Hulanda bon awe mainta

DEN HAAG  – Mescos cu e prome grupo di studiante, e grupo cu a yega awe dialuna 3 di augustus tambe tur a yega bon Hulanda. Un total di 49 studiante a yega ariba vuelo 767 di KLM. Na Schiphol un delegacion consistiendo di Minister Plenipotenciario di Aruba Alfonso Boekhoudt, directora di Gabinete di Aruba Shandra John, functionarionan di Departamento di Enseñansa di Gabinete di Aruba, studiementor y miembronan di e POC (Plaatselijke Opvangcommissie) a ricibi e studiantenan. Minister Boekhoudt a encontra e studiantenan na e gate y a acompañanan te cu nan a busca nan maleta. Asina ela tene un intercambio personal cu e studiantenan.

BON BINI DIFERENTE

E aña aki a scohe pa yama e studiantenan bon bini na Hulanda na un otro manera. No pa medio di un discurso na aeropuerto, pero den un video den e bus Minister Plenipotenciario Alfonso Boekhoudt a yama e studianntenan bon bini. E mandatario a bisa cu nan a bin studia na un pais cu otro custumber y idioma. Tambe ela menciona e retonan, sigur den e prome aña. ‘Bo mester saca afor si e estudio cu bo a scohe ta esun bon pabo. Preguntanan cu sigur bo por tin den bo cabes, pero bo no mester cana cu nan rond, pero acerca bo mentor. Haci amistad cu Hulandesnan, pa asina siña mas y alabes esaki por yudabo domina e idioma Hulandes hopi mas mihor. Disfruta lo maximo di bo periode como studiante, pa despues bo por mira bek ariba un bunita periodo den bo bida,’ asina Alfonso Boekhoudt a bisa den su mensahe den e video.

VIDEO

Tambe e video ta contene un parti na unda directora di Gabinete di Aruba Shandra John ta duna e studiantenan algun tips, manera pa nan corda na lesa nan correspondencia di Gabinete di Aruba. Tambe pa nan ta cuateloso pa firma contractnan di companianan cu ta acerca nan ariba caya of via email. Sra. John a bisa den su mensahe cu e studiantenan e aña aki a ricibi un suma grandi for di Aruba pa cubri nan gastonan pa un periodo largo. ‘Corda bai bon cu boso budget y no use den un solo biaha, pa asina bo no hayabo cu problema financiero. Tambe nos ta conseha pa cana tur momento cu e carnet di aseguro. Pa asina si algo pasa, nan por mira cu boso ta segura,’ segun Shandra John.

STUDIEMENTOR

E prome aña e studiante ta ricibi guia di e studiementor, pero pa e resto di su estudio e ta cai bou di Gabinete di Aruba. Functionario di departamento di Enseñansa di Gabinete di Aruba Ivonne Navas den e video ta bisa e studiante pa like Facebook di Onderwijszaken unda nan por keda na altura di loke ta pasando. Tambe via di Facebook nan por haci un pregunta of duna nan comentarionan. ‘Tambe un peticion na nos studiantenan pa bishita e website arubastudent.com pa informacion relevante tocante di nan aseguro. Boso a firma un contract pa un prestamo di estudio (Arubalening) cu ta otro cu e studiantenan di aña pasa. Lesa boso contract bon pa asina boso ta na haltura di kico ta para den dje,’ segun conseho di Ivonne Navas na e studiantenan. Na final di e video Minister Plenipotenciario Alfonso Boekhoudt ta bisa cu e ta spera cu e informacion brinda lo contribui na exito di e estudio y cu e diploma na final ta un sentido di orguyo pa nan mes, nan famia, pero tambe pa Aruba. E grupo cu a yega awe tambe lo participa na un programa di “opvang” obligatorio den nan ciudad di estudio y cu lo dura tres dia.Diaranson 5 di augustus lo yega Hulanda e di tres y ultimo grupo di studiante. Fotos Cortesia ArubaHuis.