Hof ta autorisa Banco Central di Aruba pa impone multa miyonario contra Pristine Estates

ORANJESTAD – Banco Central di Aruba (CBA) tin autoridad pa impone un multa di un miyon florin riba Pristine Estates N.V.  pa motibo di posibel violacion di e Landsverordening pa preveni y combati labamento di placa y financiamiento di terrorismo.  Asina Hof a determina den apelacion. Hof asina ta anula e sentencia anterior di e Corte di prome instancia, cu tabata opina cu Pristine den aña 2017 te 2019  ainda no tabata un servidor formal y por tanto no tabata cay bou e ley anti labamento di placa. E caso ta wordo manda bek na e Corte, cu awor tin cu duna un huicio di fondo tocante e multa di un miyon florin.

CASINO

Hof ta bisa cu Pristine ya desde 1999 ta opera e casino di Holiday Inn, y desde 2000 tin un permiso provisional cla for di e ministro pa dirige e casino. Hof ta splica tambe cu for di e tempo ey, Pristine a comporta su mes den e ambito social y economico manera un tenedo di permiso pa casino, entre otro, pasobra e compania ta reporta su mes na autoridadnan di supervisa, ta paga impuesto, y ta aplica pa permiso. Segun e Hof, esaki ta demuestra cu den practica Pristine ta un servidor den marco di e Lwtf y cu CBA por multa e.

DEMASIADO LEU

E opinion anterior di Corte cu solamente un permiso formal por haci un persona un servidor ta, segun e Hof, bai demasiado leu. E permiso provisional ta conta manera un permiso provisional legal, y nunca a wordo revoca. Segun Hof, esaki ta prueba cu Pristine tabata cay bou e obligacionnan di e ley anti labamento di placa ora e supuesto violacionnan a tuma lugar. Pasobra ta trata di un multa administrativo, e caso mester wordo huzga den dos instancia. E huicio di fondo tocante e multa ta  awor bek den man di e Corte na Aruba. Lesa e sentencia AKI.