Corte ta pidi gobierno pa renoba politica di beach

ORANJESTAD –Gemeenschappelijk Hof van Justitie ta considera cu gobierno Arubano mester renoba e politica di beachnan na Aruba. E politica aki ta vigente desde 2015 y segun e Hof, ta ya hopi bieuw pa controla bon manera e uso y e orden di e beachnan.

Hof a hasi e peticion aki den un sentencia di 5 di november, den cual e la confirma cu Blue Residences no ta haña permiso di precario pa tin facilidatnan riba beach.

Segun Hof, un moratorium of stop di permiso pa nobo aplicantenan por ta solamente temporario. Na un plazo mas largo, segun e Hof, esaki “no ta aceptabel”.

APLICANTENAN NOBO

Pa e motibo ey e ministro ta wordo aconseha pa actualisa e politica. Hof ta bisa cu modernisacion ta necesario pasobra e politica actual ta basa riba e situacion di 2014 cu principalmente ta proteha e permisannan cu tabata existi den e tempo ey, loke ta haci cu nobo aplicantenan no tin casi ningun oportunidad.

E sentencia ta bin for di un caso den cual Raygar Properties, doño di e compleho di condominios Blue Residences, tabata ke tin permiso pa opera un bar di beach ypa pone stoel y palapa riba e beach publico den frente di e edificio.

E ministro a rechaza e peticion aki, pasobra segun e politica di beach, na e locacion ey no ta permiti facilidadnan di playa, iy clase di permiso asina ta wordo solamente duna na hotelnan i resortnan di timeshare. Pa e sentencia completo, click AKI.