Kowloon Restaurant a celebra 40 aña cu clientenan super feliz

ORANJESTAD - Un ambiente alegre y hopi special a reina den Kowloon Restaurant diamars dia 28 di juli pa celebracion di e di 40 aniversario di e restaurant iconico den Emmastraat na Playa. Bisiña, amigo y famianan a probecha di e oportunidad pa desea gerencia y empleadonan di Kowloon masha pabien y hopi aña mas, disfrutando di un plato exkisito.

REGALO

Como muestra di amistad y gratitud pa e apoyo grandi cu Kowloon Restaurant ta disfruta di dje den e comunidad di Aruba, gerencia a regala tur cliente 40% di descuento. No tabatin ni un mesa bashi henter dia, for di momento cu Kowloon a habri su portanan te cu anochi laat, y e area di take out no tabata ni un tiki menos druk.

AMBIENTE

Loke mas a resalta durante di e dia diamars, ta ambiente den e comedor, cu tabata parce un fiesta grandi di famia, unda cu clientenan a wordo yama bonbini cu abraso, un man y “danki” di parti di e waiter y waitress cu nan ta asina custumbra cune pa tanto aña.

NETTO ARENDS

E sonrisa y mirada riba cara di e patriarca y fundado di Kowloon Restaurant, Ernesto “Netto” Arends, a refleha su alegria pa mira asina hopi di su clientenan fiel tur hunto den su comedor y ta wordo ricibi y sirbi na e forma hospitalario cu nan ta custumbra di dje, awendia bao di e liderazgo dinamico di su yiu muhe Ludmila Arends.

E FECHA MES

Dia 28 di juli a marca un dia special den e historia di e industria di hospitalidad y restaurant na Aruba y en general tambe den e mundo di negoshi riba nos isla. Gerencia y personal di Kowloon Restaurant ta orguyoso di ta parti di e comunidad di Aruba y ta gradici tur cliente cu a yega di bishita nan den e ultimo cuater decadanan y te dia di awe ta bishita nan y ta recomenda Kowloon, pa nan lealtad y amistad.