- Doño di Tesla, Elon Musk por gana un bonus di 1 biyon dollar
- Colaboracion pa aumenta exito di estudio pa studiantenan Caribense ta haya continuacion
- Ajax a despedi entrenador su John Heitinga despues di mal cuminsamento di temporada
- Minister Croes a firma acuerdo na Bonaire pa Vierlanden Overleg Enseñansa y Cultura
- Gobierno di Aruba a emiti conseho di biahe negativo pa Venezuela y Haiti
Hulanda ta risca perde 9% di e camber pa studiante den dos aña
AMSTERDAM - Hulanda ta risca perde 9% di e camber pa studiante den dos aña. Esaki sigur ta mal noticia pa studiantenan cu ainda ta en busca di cas e aña aki ainda, y esnan cu ta bin den e añanan siguiente. Segun un relato den e portal hulandes NOS, E falta di cas pa studiante ta sigui aumenta pasobra cada bez mas doñonan ta bende e casnan cu nan tabata huur. Specialmente den e ciudadnan grandi, e falta por bira mas grandi ainda. Den un aña mas cu 5000 cas a wordo bende, loke ta corresponde cu mas o menos 10.000 camber pa studiante.
Esaki ta sali cla for di un raport di oficina di investigacion ABF Research encarga pa Ministerio di Vivienda y Ordenamento Espacial (VRO) y Kenniscentrum Studentenhuisvesting (Kences).
E cantidad di cas pa studiante bende pa personanan priva ta un y mey bez mas halto cu un aña pasa. Aunke tin hopi construccion nobo pa corporacion di vivienda, Hulanda ta risca di perde 9 porciento di e camber pa studiante den dos aña, segun Kences.
Falta ta crece mas
Hulanda tabatin durante e ultimo aña di estudio un total di 393.000 camber pa studiante di educacion superior.
Segun e director di Kences, Jolan de Bie, for di 2022 ta construi un promedio di 5000 camber pa studiante pa aña, mayormente pa corporacion di vivienda, y solamente un porcion chikito ta wordo compra pa personanan priva pa despues aluga.
“Esaki ta causa cu e falta ta sigui aumenta,” de Bie a bisa. E calcula cu den dos aña por tin un reduccion di 45.000 camber priva pa studiante. Pa pone esaki den perspectiva: di e cantidad total di cas pa studiante, mas o menos mitar ta den man di doñonan priva.
Specialmente den e ciudadnan grandi cu tin hopi studiante, e falta por aumenta mas pa motibo di e benta di casnan, segun e raport di ABF. Na Amsterdam e cantidad di cas priva bende ta e mas halto cu mas di 2000 cas, sigui pa Rotterdam (1025), Utrecht (810) y Groningen (695).
Combinacion di motibo
E motibo pa kico personanan priva ta bende mas cas di huur awor ta un combinacion di situacion di mercado di vivienda y medidanan nobo di gobierno, segun Sander Burgers, economista di mercado di vivienda na ING.
E ta splica cu e tasa di interes awor ta mas halto cu cuatro aña pasa, asina cu personanan por gana mas si nan invierte nan placa den otro lokeu. Ademas, e precio di venta ta mas halto, loke ta haci mas atractivo pa bende e casnan cu nan tabata huur.
Na otro banda, e ta bisa cu e doñonan ta bende nan casnan pa motibo di regulacion di gobierno. Tin un precio maximo di huur establece bou di e Ley di Huur Acesibel, y financieramente a bira menos atractivo pa aluga cas despues cu impuesto riba e propiedadnan aki a subi.
Ademas, e regla pa comparti vivienda tambe a wordo mas estricta. Segun Burgers, tur esaki ta motibo pa inversionistan pa bende mas lihe nan cas di huur.
“Nos ta mira cu ora gobierno ta tuma medidanan cu ta haci cos mas dificil pa e doñonan di cas, e problema solamente ta move di un banda pa otro sin soluciona e causa,” Burgers a bisa. “E resultado ta cu comprador por haya cas mas facil, pero structuralmente mester tin mas oferta di vivienda.”
Con tin cu bai awor
De Bie tambe ta mira e medidanan nobo di gobierno como un di e causa pa e reduccion di cas pa studiante. Pero e ta enfatisa cu e Ley di Huur Acesibel no ta solamente negativo, ma cu e regla mas estricta pa comparti cas cu tres of mas huurdo a haci menos atractivo pa doñonan keda aluga nan propiedad.
“Nos ta bisa na municipio: laga comparti vivienda sin permiso.” E ta bisa cu asina e precio di huur por subi un tiki, haci e negocio mas atractivo pa doñonan, “pero combina esaki cu un ayuda di huur pa studiante cu ta biba den esnan camber.”
Awor dia, algun studiante cu ta biba den cas di corporacion di vivienda ta haya e ayuda aki, pero esnan den huur priva casi nunca ta haña.
“Si nos ke soluciona e problema na corto plazo, nos mester actua awor,” de Bie a conclui.
Ajax a despedi entrenador su John Heitinga despues di mal cuminsamento di temporada
AMSTERDAM – E seleccion di futbol profesional hulandes Ajax a despedi John Heitinga y a pone dje na non-activo inmediatamente. E club ta busca un nobo entrenador principal despues di un mal cuminsamento di temporada. Tambe e contrato di e asistente entrenador Marcel Keizer a wordo termina. AJAX, banda di Feyenoord, ta un di e clubnan mas popular tambe na Aruba y ta hopi sigui.
Heera Dijk scohi como vocero nobo pa Relacionnan di Reino pa partido D66
DEN HAAG – E fraccion nobo di D66 a eligi Heera Dijk como vocero pa Relacionnan di Reino. “Un regalo di cumpleaños”, paso awe e ta celebra su 46 aña di edad. Noticiacla recientemente a entrevista Dijk den e edicion special di Noticiacla LIVE.
Formacion pa un gabinete nobo hulandes a cuminsa
DEN HAAG - Cu e nombracion di Wouter Koolmees como verkenner, e formacion di un gobierno nobo por oficialmente cuminsa. A keda acorda cu Koolmees lo cuminsa pronto y den un siman mester pone den mapa e opcionnan pa forma un gabinete nobo. Tur partido ta insisti riba un verificacion rapido, pero e deseo di contenido di e partidonan no ta den un mes linea.
Wouter Koolmees (D66) ta cuminsa como verkenner den formacion di gabinete nobo di Hulanda
DEN HAAG - Ex-minister, vice-premier y miembro di Tweede Kamer di D66, Wouter Koolmees, ta cuminsa su trabou como verkenner den formacion di gabinete. E tin e tarea pa papia cu tur fraccion di lidernan den Tweede Kamer tocante nan preferencia pa un coalicion. Riba base di e combersanan akinan e mester redacta un conseho tokante e paso siguiente di e formacion.
Thom de Graaf ta retira como vice-presidente di Raad van State
DEN HAAG - Thom de Graaf lo retira den ocho luna como vice-presidente di e Conseho di Estado, osea Raad van State. E ta haci esaki principalmente pa motibo personal. “Mi no a haña suficiente tempo pa mi bida personal y otro interesnan aparte di trabou,” e a bisa den un comunicado di prensa. E Conseho di Estado ta e organismo cu ta duna conseho na gobierno y Parlamento. Ademas, e ta e tribunal mas halto administrativo di e pais. Segun Constitucion, e Rey ta e presidente di e Conseho di Estado, pero e vice-presidente ta e persona ku tin e administracion diario bou di su man.
TUI FLY a celebra 20 aña di conexion cu Aruba cu buelo awe na Schiphol
ORANJESTAD / RIJSWIJK – E vuelo di TUI fly OR 381 a keda festivamente despedi na Aeropuerto Schiphol awe. dialuna 3 di november ultimo. Cu e vuelo aki, TUI fly ta celebra un logro special: e compania di aviashon ta bula entre Amsterdam y Aruba pa exactamente 20 aña e aña aki. Prome cu salida for di Amsterdam, un delegacion di TUI y Schiphol a conmemora e momento aki, y pasaheronan a ricibi un recuerdo di e vuelo special aki. Arjan Kers, Director Gerente di TUI Hulanda y Belgica: "Cu e ruta Amsterdam – Aruba, nos ta trece hopi turista pa e isla tur aña, ademas e ta un conexion importante entre Hulanda y tambe cas pa e localnan. P’esey mi ta orguyoso cu nos ta celebrando 20 aña di conexion awe cu Aruba."
Follow NoticiaCla
