Venezuela y Aruba a papia riba 'cooperacion entre Caracas y Oranjestad’ na New York

NEW YORK – Minister di relacionnan exterior di Venezuela, Delcy Rodríguez a confirma cu ‘el a papia cu prome minister di Aruba Mike Eman na New York siman pasa riba tema di e.o. cooperacion entre Caracas y Oranjestad y tambe temanan di e agenda internacional’. Asina e la menciona riba su cuenta di twitter den fin di siman. Esaki a sosode durante e reunionnan na Nacionnan Uni, unda cu tanto Aruba como Venezuela tabata presente.

REUNION CU EMAN

Rodríguez a confirma cu diahuebs siman pasa e la sinta cu Eman. Eynan e la bisa prome minister Eman cu Venezuela lo sigui boga pa e integracion latinoamericano y caribeña, ‘mediante e diplomacia bolivariana di paz’. E ta un tema delicado unda cu recientemente te hasta un parlamentario di Aruba a haya critica di ta ‘mete’ den asuntonan internacional. Eman a representa Reino Hulandes durante e bishita aki, y a papia tambe na nomber di Reino Hulandes. No ta conoci si durante e reunion cu Rodríguez, e la papia como Aruba of como Reino Hulandes. Foto ta cortesia di Rodríguez su pagina di twitter.