Principe Britanico Andrew no ta principe mas y tin cu muda segun orden di rey Charles

LONDON - E principe Britanico Andrew a perde su titulo di “principe” y awor e ta yama oficialmente Andrew Mountbatten Windsor, segun un comunicado di Palacio Buckingham. Tabata conoci cu Andrew lo perde algun di su titulo, pero e desicion cu e no ta mas principe a yega manera un sorpresa. Buckingham Palace a anuncia tambe cu Andrew tin cu bandona su residencia lujoso Royal Lodge. No ta conoci ainda ora esaki lo tuma efecto. Segun BBC, e lo bai biba den un otro cas di rey Charles, Sandringham Estate den Norfolk. Esaki ta un propiedad privá di Charles y no ta financia pa e gobierno Britanico. Andrew ta biba den Royal Lodge desde principio di e siglo aki, un cas grande y elegante caminda e no ta paga huur.

EPSTEIN

E ruman menor di rey Charles ta bao di presion publico pa motibo di su amistad cu e delincuente sexual Epstein. Den e luna aki a wordo publica postumamente e memoria di e victima di Epstein, Virginia Giuffre. Den su relato, e ta bisa cu cuando e tabata menor di edad, e a wordo abusa sexualmente varias bez pa Andrew.