Seccionnan den parkeerplaats di Aeropuerto di Aruba ta cera temporalmente

ORANJESTAD  – Aruba Airport Authority N.V. (AAA) a informa  cu trabou di mantencion relaciona cu instalacion di panel solar riba seccionnan di e area di Parkeer Publico lo tuma luga for di 3 di November te 3 di December 2025. Durante e periodo aki, seccionnan di e area di Parkeer Publico lo sera temporalmente den fase pa facilita e actividadnan di mantencion. Pa garantisa cu e molester pa biahero y bishitante lo ta menos posibel, e area di parkeer lo sigui habri y lo ta accesibel durante e periodo di mantencion, cu lo cera zonanan designa so den e area di Parkeer Publico.

Informacion Importante pa usuarionan di e area di Parkeer Publico

• Zona di Trabou: Lugarnan marca cu pilon oranjo of otro ekiponan di demarcacion ta indica un zona activo di trabou. Por fabor no parkeer den e lugarnan aki.

• Siguridad di Vehiculo: Pa preveni daño of cualkier tipo di molester, ta recomenda cu usuarionan move nan vehiculonan for di e zonanan cu lo ta marca pa mantencion den e area di Parkeer Publico.

• Disclaimer di Parkeer: Tene na cuenta cu uso di e area di Parkeer Publico ta na riesgo propio di e doño di e vehiculo.

Si bo sa di amigonan of famia cu tin vehiculo para na aeropuerto mientras nan ta afo, por fabor comparti e informacion aki pa nan ta na altura y por move nan vehiculo si por.