Na St Maarten, Corte a ordena ex-minister paga 92.1 miyon dollar pa sabotage di proyecto

PHILIPSBURG – Tribunal di Prome Instansia a ordena ex-minister di infrastructura y Miembro di Parlamento (MP) Theo Heyliger pa paga US$ 92.1 miyon pa e daño cu el a causa na un   compañia di real estate cu tabata diseña pa desaroya un centro di compra y entretenimiento na puerto di crucero mas di un decada pasa.

Un huez a dicta e suma aki den un veredicto diamars. E desicion aki a pone fin na e proceso largo di demanda civil cu Zebec Development NV y su propiedatario Luis y Angel Gioia a presenta contra Heyliger, cu segun nan, el a usa su poder político pa para nan proyecto “Dutch Village” despues cu nan a nenga di paga un porcion di nan ingreso di alquiler proyecta manera soborno.

E tribunal tabata a haya Heyliger culpabel dos biaha anteriormente, den fayo na oktober 2023 y mei 2025, pero tabata warda te diamars pa determina e cantidad final. E juez a rechaza e reclamacion di Zebec contra co-defendiente Ocean Drive Properties NV y su propietario Deepak “Danny” Ramchandani y Prem “Peter” Mirpuri.

E rumanan Gioia a bisa cu Ramchandani y Mirpuri tabata cómplice den e sabotage y cu nan a ofrece soborno na Heyliger pa para e proyecto di Zebec y duna’e na nan compañia Ocean Drive. Pero diamars, e tribunal a regla cu Zebec y e Gioianan no por a comproba e acusacion aki.

A sali den veredicto cu un otro compañia di Ramchandani y Mirpuri tabata permiti un di e compañianan di Heyliger pa tuma $5,000 pa luna di nan ingreso di alquiler via un acuerdo di subarrendo sospechoso. Pero e huez a regla cu esaki no tabata suficiente pa proba cu Ocean Drive o su doñonan a interferi directamente cu Zebec.

Den e veredicto di diamara a sali cu e acuerdo entre Harbour Arcade NV y e compañia di Heyliger, Frivol, a cuminza den 2003 y a sigui te minimo 2014.

E caso di Zebec contra un cuater co-defendiente – St. Maarten Quarter Development Company NV, un subsidiario di Royal Caribbean Cruises Ltd., cu su aprobacion tabata necesario pa e proyecto Dutch Village – ya tabata wordo rechaza. E tribunal a regla cu St. Maarten Quarter Development tabata cubri su responsabilidad cu un compensacion di $10 miyon paga na Zebec den 2015.

Heyliger a planea pa apela e veredicto, segun un vocero di dje diamars anochi. “E proceso tabata hopi dificil y desalentador, particularmente pa falta di representacion legal apropia den momento crucial di e caso,” e vocero a bisa, refiriendo na hecho cu e equipo legal di Heyliger no a entrega nomber y direccion di testigonan mas tempran e aña aki. E fayo aki a forsa e huez pa cera e parti aki di e procedimiento, suponiendo cu Heyliger no tabata desea combati e demanda di Zebec.

“E prioridad awor ta pa asegura representacion legal efectivo y pa garantisa cu e caso haya un revision husto y completo den proceso di apelacion,” e vocero a agrega.

Heyliger ta sirbiendo un castigo di cinco aña di prizon pa acceptacion di soborno y labamento di placa, pero e caso aki no tin relacion cu e proyecto Dutch Village.

DUTCH VILLAGE

Den 2010, Zebec a firma un acuerdo cu St. Maarten Harbor Cruise Facilities NV pa construccion di e proyecto “Dutch Village,” cu tabata consisti di 16 tienda riba un terreno di 13,000 metro cuadra situa entre e dos haf di crucero. E tereno a wordo entrega den maart 2012, pero segun e hermaonan Gioia, tur cos a para poco despues cu nan a ricusa di cumpra e peticion di Heyliger.

Segun Luis Gioia, autoridatnan di haf a pone obstaculo pa nan cuminsa construccion. E la bisa cu Mark Mingo, e CEO di St. Maarten Harbour Group of Companies na e momento, a manda un carta den juli 2014 anulando e proyecto paso “no tabata cuminsa a tempo.”

E acuerdo di Zebec cu e haf tabata require aprobacion formal di St. Maarten Quarter Development Company. Esaki finalmente no a yega, segun e abogado di Zebec pa motibo di interferencia di Heyliger.

Ocean Drive a remplasa Zebec manera desarrollador di e facilidad den augustus 2015.