Gerente di Cool Casino ta desmenti intimidacion di trahadonan

ORANJESTAD – Ningun momento trahadonan di Cool Casino (den RIU Palace) a pone trabou abou y tampoco a wordo menasa. E gerente di e casino a reacciona serca NoticiaCla.com, desmintiendo informacion suministra pa sindicato FTA. El a indicando cu e no tabatin ‘ni arte ni parte’ di e loke a sosode diasabra anochi. Mes momento e ta desmenti cu e lo ta intimida e trahadonan y menasa nan cu retiro” Claro cu no” tabata su palabranan diadomingo merdia. E ta admiti di a papia cu e presidente di e sindicato diasabra anochi, y a dune e mesun version. NoticiaCla.com tambe a indica esey diasabra anochi, esta cu no tabatin accion, aunke na prome instancia esey tabata e informacion inicial.

PAZ LABORAL

“Loke cu Cool Casino kier, ta paz laboral. E trahadonan ayera te hasta a traha overtime. Asina druk nos mes tabata”, e gerente a sigura NoticiaCla.com. El a confirma cu dialuna atardi 4’or lo tin un reunion cu e sindicato, unda cu lo discuti e asuntonan laboral. Trahadonan di Cool Casino na RIU Palace Hotel por poco a pone trabou abou diasabra anochi como protesta contra e gerente di e casino.

PROME INFORME DI ACCION

Prome informe cu a sali diasabra anochi, tabata enberdad cu e trahadonan a pone trabou abou. Presidente di sindicato FTA, Hubert Dirksz a informa NoticiaCla.com inicialmente, cu trahadonan a pone trabou abou. Despues ora cu e la yega na e casino, a resulta cu e situacion tabata diferente. Pero a para ariba si, cu e motibo cu trahadonan kier a para trabou, ta cu e gerente di casino lo ta intimidando y menazando e trahadonan cu retiro.  “E trahadonan no ta sigui soporta e tipo di abusonan aki” Dirksz a finalisa bisando. E la bisa tambe cu e la dirigi su mes personalmente na e casino y papia cu e gerencia y algun trahado. "Gerencia ta desmenti cu tin problema y cu lo sinta dialuna 4'or cu FTA y algun trahado pa atende cu e issuenan presenta. E foto ta di entrada di casino, for di den lobby di Riu Palace na Palm Beach.