Cantidad grandi di votadornan Hulandes ta zweef ainda pa eleccion awe

DEN HAAG/ WILLEMSTAD – Awe 29 di october tin eleccion pa “Tweede Kamer” (parlamento) Hulandes. Profesional den comunicacion y analista politico Clifton Walle ta na Hulanda actualmente y a sigui e campañanan politico y e ultimo debatenan di serca. Den e ‘podcast’ 3’or cu Gino, e ta duna un analis profundo di e situacion actual. Segun su analis, Walle ta bisa cu e lucha pa ken lo gana e eleccion ta bai entre cuater partido: PVV, GroenLinks/PvdA, CDA y D’66. E ultimo dianan prome cu e eleccion tabata determinante pa e resultado di awe. Segun analisnan, entre 50 te 70 porshento di e votadornan Hulandes ta zweef ainda. Pues, hopi elector no tin sigur pa ken nan lo vota, loke no ta un situacion normal pa Hulanda, Walle ta splica.

E ta sigui indica  cu e ultimo dianan a tin desaroyonan interesante. Caminda PVV a haña 37 asientonan durante e eleccion di 2023, awor ta mustra cu lo perde rond 11 asientonan, segun e ultimo encuestanan. Walle ta bisa cu esaki por tin di haber cu e echo cu e no a participa den e prome debatenan politico.

Motibo pa esaki ta tocante seguridad y menasanan contra su persona. Walle ta bisa cu tur cos di partido PVV ta drei rondo di lider politico Geert Wilders, y si e no ta presente publicamente, esaki ta afecta e partido mesora. E ta sigui bisa cu otro partidonan manera GroenLinks/PvdA, CDA, D’66 y VVD ta ataca Wilders, indicando cu e a haña oportunidad pa gobierna, pero no a haci un trabou.

E ultimo gobierno Hulandes den cual PVV tabata parti a dura un tiki mas cu un aña y a bira dos biaha demishonario despues cu PVV mes a sali for di e coalicion, sigui despues pa partido NSC. NSC, cu na 2023 a logra 20 asiento den eleccion parlamentario, segun e ultimo enkuestanan lo saca 0 asiento, y e gran parti di e votonan aki ta bai bek pa CDA, e partido original di Pieter Omtzigt, fundado di NSC.

CDA, cu na 2023 a cay te na 5 asiento, segun e enkuestanan lo haña e eleccion aki entre 20 pa 25 asiento. Otro partido cu ta creciendo den e ultimo siman ta D’66, segun Walle a indica. E partido ta haci un trabou tremendo den campaña. Segun e ultimo encuestanan, e partido por crese di 9 asiento cu a logra na 2023 pa 22 te 25 asiento.

Pa loke ta GroenLinks/PvdA, e partido cu recien tabata mustra cu lo bira e mas grandi den e eleccion, durante e ultimo debatenan politico e otro partidonan a lansa hopi atakenan contra dje, cu e consecuencia cu e a cay bek den e encuestanan. Pa VVD, e encuestanan ta indica cu e partido ta sigui perde asiento y ta para na mas òf ménos 16 asiento.

Topiconan cu mas a domina den e campañanan ta e problematica di cantidad di  stranheronan cu ta busca asilo na Hulanda, falta di suficiente casnan cu ta causa den parti pa e situacion di asilo, guera na Ucrania, economia y e normanan di nitrogen cu kunukeronan mester tene nan mes na dje.