Horcan Melissa yega Oost di Cuba, pero a baha den forsa

HAVANA – Horcan Melissa a yega mainta tempran na banda oost di Cuba. Den e pais, cientos di miles di persona a wordo evacua pa centro di refugio. Riba e mapa di tempo interactivo di Zoom Earth, por mira cu e wowo di e tormenta tabata rond 24 kilometer for di e ciudad Santiago di Cuba rond 8.30 ora Hulandes. Cu bientunan maximo di 193 kilometer pa ora, e horcan tabata move for di Jamaica na direccion di noroeste. E horcan entretanto a baha den forsa y awor ta un tormenta di categoria 3. Dor di e awacero constante, tin posibilidad di inundacion y deslizamentonan di tera na Cuba, segun advertensia di meteorologonan. Ta spera cu Melissa lo yega na Bahamas mas laat awe.

DANO NA JAMAICA

Melissa a yega Jamaica ayera manera un horcan di categoria 5, e categoria mas fuerte. Cu bientunan te 295 kilometer pa ora, e tormenta a causa hopi daño. E Servicio Nacional pa Desastre a informa cu scolnan, hospitalnan, casnan y otro edificio a wordo afecta. Tambe hopi palo a sali for di tera y cayanan y casnan ta bou di awa. E prome minister jamaicano Andrew Holness a declara e isla manera zona di desastre. Te awor no tin noticianan nobo di viktiman. Durante preparacion pa e horcan, tres persona tabata a perde nan bida.