Den e simannan cu ta bini lo tin mas retraso y cancelacion den Merca dor di shutdown

WASHINGTON - Den e simannan cu ta bini lo tin mas retraso y cancelacion di buelo den Merca dor di shutdown y esaki por afecta Aruba tambe. E shutdown di gobierno mericano ta causa un desorganisacion social cada bez mas grandi den Merca, awor cu e desacuerdo entre Republicanonan y Democratannan tocante e presupues di gobièrno ta dura casi un luna. Autoridadnan ta preveni tambe mas problema den aviacion. Sean Duffy, ministro di transporte di Merca, a adverti diamars na Fox News cu biaheronan lo experiencia mas retraso y cancelacion di buelo den simannan cu ta bini. E shutdown ta empeora e falta di personal entre controladornan di trafico aereo. Den fin di siman ya tabatin ora di retraso largo dor di e mes falta di personal, despues cu hopi controladornan a wordo manda pa cas sin paga.

CONTROLADORNAN DI TRAFICO AEREO NO TA WORDO PAGA

Door di e shutdown, hopi empleado publico ta obliga pa keda na cas pasobra e gobièrno no por paga nan salario. E mas o menos 13.000 controladornan di trafico aereo den pais mester sigui traha, pero pa awor nan no ta wordo paga. Duffy a bisa cu ta mira mas empleadonan ta reporta nan mes malu of simplemente no ta presenta na trabou, mientras cu algun ta busca trabou adicional of otro fuente di ingreso pa por sobrebibi.

NEGOCIACIONNAN

E ministerio di Agricultura di Merca tambe a anuncia cu for di 1 di november no lo duna mas yudansa via e Supplemental Nutrition Assistance Program (SNAP), un programa di bon di cuminda pa ciudadano mericano cu ingreso abou. Mientras tanto, no tin señal di un fin pa e shutdown. E Democratannan ta bisa cu nan ta warda te ora e Republicanonan kier negocia tocante e subsidionan pa e Affordable Care Act (Obamacare). Pero e Republicanonan ta insisti cu nan no lo papia tocante e subsidionan te ora cu e Democratannan a vota pa rehabri e gobièrno.