Ex minister Besaril ta bay bringa su caso te corte di casacion

ORANJESTAD – Ex minister plenipotenciario Guilfred Besaril a dicidi cu e ta bay ‘all the way’, pa loke ta su caso, cu ta nifica cu e ta bay te casacion. Noticiacla a haya confirmacion di su abogado diahuebs, despues di a delibera algun dia, cu su cliente a opta pa bay casacion, cu ta realmente e ultimo bentana legal cu ta keda e ex mandatario. Esaki aunke cu a wordo bisa cu e caso di apelacion cu e la perde, tabata su ultimo oportunidad y cu e veredicto inicial di culpabilidad y 10 luna prizon tabata irrevocable. 

KICO TA PASA AWO

Mientras cu ta bisa cu e sentencia cu Besaril a perde den apelacion ta irrevocable, e abogado ta bisa cu usualmente ta warda cassatie, prome cu ehecuta un sentencia. Como ehempel ta mustra riba e caso di ex ministernan Paul Croes, Benny Sevinger y otro personanan cu a haya sentencia y cu a opta pa bay bringa esaki te den corte di casacion. Segun e abogado (Canwood:red), si ministerio publico purba ehecuta e sentencia prome cu tin sentencia den casacion, e abogado a sigura cu lo bay corte atrobe pa suspende e sentencia te ora cu e decision final cay den corte di casacion.  

SENTENCIATabata dialuna ultimo cu e ex mandatario a tende cu e la perde e caso di apelacion di su caso penal Tulipan, y cu esaki ta nifica cu e tin cu sinta un castigo di por lo menos 10 luna di prizon, y paga mas di 100 mil florin bek na pais Aruba. E motibo cu e la perde e caso, ta ‘simplemente’ pasobra e apelacion di parti di su abogado, a wordo entrega ‘laat’.