Dammers: Ta trata ley Aruba Financieel Toezicht despues di reces

ORANJESTAD – Parlamento ta trata e ley di Aruba Financieel Toezicht (AFT) despues di reces. Awe mainta vice presidente di parlamento Chris Dammers a confirma esaki na NoticiaCla.com. Esey kier men cu definitivamente e ley no ta wordo trata y pasa prome cu e ‘deadline’ di 1 di augustus (esta diasabra awor), segun palabracion cu Hulanda dia 2 di mei ultimo, y pa cual tin un protocol firma. Mes momento, Dammers ta confirma tambe cu parlamento no ta riba un ‘standby’ mas pa e ley, manera cu tabata e caso anteriormente. Y loke ta mas probable, segun Dammers, cu lo trata e ley te fin di augustus. Esey ta hopi serca cu e proximo RMR (conseho di minister di reino hulandes) cu lo dicidi e momento ey riba e caso.

MIKE EMAN

E siman aki ainda, prome minister Mike Eman a bisa NoticiaCla.com cu lo ta purbando pa e siman aki ainda, keda cla den tal forma cu por sikiera entrega e ley na parlamento pa nan por ‘agendeer’ esaki. Pero diabierna a yega y ainda e ley ta na Raad van Advies (lesa otro articulo riba e tema). Tambe Eman a bisa cu e siman aki (comienso di e siman aki) e ley mester a bay Hulanda pa haya e comentarionan necesario ‘pasobra Hulanda tambe ta forma parti di esaki’. Segun Eman su splicacion, ta tanto Hulanda como Aruba a kere cu por a traha e ley den un forma di un landsverordening, pero a resulta cu esaki no ta posibel.

STANDBY

Bek pa parlamento, Dammers a bisa cu te cu awe diabierna, e ley no a drenta. “No ta riba un standby mas. (E) no tabata riba nos planning” Dammers a bisa. For di awor pa fin di reces (17 di augustus) tin hopi hende afo, y esey kier men cu no tin hende pa trata e ley. “A tene e ultimo dos simanan di juli habri, pero e ley no a yega” Dammers a sigui bisa. Nan lo keda warda su yegada manera tur otro ley, pero lo dune su debido espacio pa por trate.

ESPACIO

“Ora cu e yega mes, lo mester dune su espacio pa tratamento. Pa yama e centrale commissie (CC) pa haci pregunta na gobierno. Despues bolbe yama un CC pa aproba e verslag di staten” Dammers a continua bisando. Riba esey lo dura atrobe un pa dos siman pa gobierno entrega su nota basa riba e relato di parlamento. Unabes cu esey sosode, mester duna parlamento por lo menos 4 dia prome cu por yama e reunion. Dado caso e ley drenta dentro di e dos siman di reces, e lo wordo manda digital pa tur miembro di parlamento di biaha. Asina cu reces caba e ora, lo yama un CC pa por trata e preguntanan cu tin.

FIN DI AUGUSTUS

Esey ta nifica, cu teniendo tur esaki na cuenta, por dura te fin di luna di augustus, prome cu e ley por keda trata y pasa. Dammers a confirma esaki tambe na NoticiaCla.com. Tur e tempo aki, Hulanda lo ta en espera di e progreso, y dicidi riba 4 di september proximo, kico nan lo haci riba e tema aki.