Angel Bermudez ta acepta pa bira minister di Finanza

ORANJESTAD – Angel Bermudez, ex minister den prome gobierno di Aruba como un pais autonomo, a dicidi cu e ta acepta pa bira e proximo minister di Finanza di Aruba. Esey ta si e peticion wordo haci na su persona oficialmente. Mientrastanto gabinete Eman II a nombra Mike de Meza temporalmente den e funcion, te ora cu e proceso cana su caminda pa Bermudez por bira minister. De Meza mes a confirma na NoticiaCla diaranson anochi cu 'its temporary'. Dos dia pasa Bermudez ainda tabata Chief of Staff di e ex minister Juan David Yrausquin. Den un combersacion cu NoticiaCla diaranson, e la confirma cu e la dicidi cu e ta acepta e reto aki. Awor e peticion formal tin cu bin, y ora cu e bin, si e bin, e lo aceptele. Ora cu NoticiaCla a puntre si e la haya e peticion caba, e la contesta “Ainda no”.

Tabata ora cu e anuncio di retiro di Yrausquin a cay, comienso di e luna aki, tur wowo, mesora a cayriba Bermudez, cu a keda keto tur e tempo aki. Y comprendible tambe despues di su ultimo declaracion den forma di primicia na NoticiaCla ora a hacie e pregunta e tempo ey. E tempo ey e la mustra hopi cla cu aunke cu e no ta ansioso ni ambiciona pa e funcion, si haci apelacion pa e reemplaza Juan David Yrausquin como minister, e lo ta disponibel pero solamente como vakminister.

Mes momento e ta bisa si cu no ta prudente e momento ey caba pa expresa nada otro cu e hecho cu e ‘ta asisti Yrausquin den loke ta parse di ta un crisis constitucional’. Awor cu e retiro di Yrausquin ta tras di lomba y a nombra un minister temporal, e decision di Bermudez ta importante. NoticiaCla a confirma cu Bermudez ta e unico candidato cu ken premier Eman a papia cune, como posible reemplazo. E ta haci mencion di candidatonan, pero a referi solamente na un persona.

For di momento cu e rumornan a cuminsa core riba ken e candidato por ta pa eventualmente reemplaza Yrausquin, un di e nombernan cu mas a cay tabata Bermudez, y NoticiaCla tabata e prome cu a acerca doño di curpa. “E ta un opcion aworaki te ora bin un cambio” Bermudez a sigura NoticiaCla e tempo ey. Pero no ta asina cu e ta considera su mes un ‘front runner’ pa e funcion awor. “Been there, seen that, done that” Bermudez a contesta rapidamente, refiriendo na su periodo como minister den e prome gobierno di Aruba despues di a haya su Status Aparte. E tempo ey la ocupa e funcion di minister di Trafico y Comunicacion di februari 1987 pa maart 1989. Pues tin e experiencia y e conocemento amplio di con politica ta. “Mi no tin echt ambicion politico aworaki y mi no ta excita pa haye tampoco” Bermudez a sigui bisa. E la biba ultimo 20 aña de exterior y durante e periodo ey e no por a vota. De hecho e no ta ni forma parti di un partido politico na Aruba. Pero si haci un apelacion pe, ‘mi tey pa yuda te ora cu no mester di mi ayudo mas”. Prome cu Bermudez a bira e ‘Chief of Staff’ di Yrausquin, e tabata na cabes di e departamento di impuesto di islanan Bes, esta Bonaire, Saba y Statia. Prome cu esey, e la fungi como socio di Ernst & Young na Corsou y miembro di Raad van Advies, tambe na Corsou.