Ley di Aruba Financieel Toezicht ta bek na Raad van Advies

ORANJESTAD – Mientras cu parlamento ta (bata) den espera di e ley Aruba Financieel Toezicht (AFT), e ley mes tabata wordo revisa y coregi, prome pa DWJZ (Directie Wetgeving & Juridische Zaken) y despues pa Raad van Advies(RvA). Dialuna ainda, NoticiaCla.com a haya confirmacion cu e ley tabata serca DWJZ y cu nan tabata ‘kedando cla’ pa mande pa gobierno. Despues den siman, a bira conoci cu e ley a ‘bin bek’ pa RvA, unda cu un biaha mas mester a presenta un otro conseho.

VERSION NOBO

NoticiaCla.com tin confirma cu e ley ta ainda na RvA pendiente un conseho. No ta conoci cuanto tempo lo dura awor prome cu e ley por keda cla eynan, y sigui su caminda. No ta conoci tampoco si gobierno a logra manda e version ‘nobo’ pa Hulanda caba, pa por ‘compara’ esaki cu e version biew y wak si awor si partidonan ta ‘riba e bon caminda’ cu e version nobo.

TARDANSA

Henter e proceso aki a causa e tardansa necesario cu ta pone cu dificilmente e ley por a drenta parlamento na tempo (lesa otro articulo), te pa e wordo trata prome cu 1 di augustus manera planea y palabra cu Hulanda, durante un reunion di 2 di mei ultimo, cu a resulta den un protocol firma. Hulanda di su banda, e siman aki ainda a confirma na NoticiaCla.com cu nan ta warda dia 4 di september proximo, unda cu nan lo tin cu tuma un decision basa riba e ‘progreso’ di Aruba den e asunto aki.