Na Hulanda, barco autonomo ta logra tambe mara y sali su so

WAAL – Na Hulanda na de Waal ta haci pruebannan cu un barco cu por sali y mara completamente su so. Tin un capitan abordo, pero e por dedica su atencion na otro tarea y no necesariamente na control di e barco. “Si nos automatisa cierto tarea, e capitan no mester actua constantemente, sino e por monitor e sistema,”   Pim Dijt, desaroyador di sistema, ta bisa e medio Rijnmond. “Asina e tin mas tempo y espacio pa sigura cu tur cos ta pasa na manera sigur.” Segun Dijt, e proyecto ta combina dos tecnica cu ya tabata existi: un banda ta navegacion autonomo, y e otro banda ta sistema di seguridad. Pa esaki ta wordo usa camaranan, sensornan y autopiloto inteligente cu ta yuda e capitanan den navegacion. E sistemanan ta tuma na cuenta nivel di awa, pilar di brug y altura di waf.  Dijt ta bisa cu e tecnologia mester haci e navegacion mas eficiente. “Mara y sali for di un haf ta un tarea hopi compleho. E capitan mester haci hopi cos mesora: e mester control e barco, e mester sigura cu tur cos ta pasa cu seguridad y e mester mantene contacto cu e personal.”  

RESPONSABILIDAD  

Ta keda hopi trabou pa e capitan mes. “E por mira bon rond di dje y mantene contacto cu e otro barconan na laman. Ora bo ke drenta un haf, bo mester coordina cu e otro barco pa mira si tin espacio,”   Dijt ta splica. Aunque e pruebannan ta mostra bon resultado, e capitan ta keda responsable, Dijt ta enfatisa. “E ta semper e persona cu ta monitor e sistemanan y cu ta sigura cu si algo bai malo, e mes por   drenta y pone e barco na waf manera sigur.”