Candidata politico Heera Dijk (D66) kier duna un bos na Caribe den Tweede Kamer

DEN HAAG – Pa Heera Dijk, Tweede Kamer tabata parse hopi leu mirando e encuesta di algun siman pasa. Pero awor cu D66 ta subi fuerte den e polls, cu su posision na e 18e luga den e lista di candidatonan, e tin un chens real pa bira miembro di parlamento. Esaki ta nifica cu despues di e eleccionnan di 29 di oktober, e parti caribense di Reino por bolbe tin un representante propio den Den Haag.  

Heera (45) a nace (na Delft) y a crece na Hulanda como yiu di un mama di Corsou y un tata di Surnam. “Nan a bin pa studia na Hulanda y a keda ei. Pero e lazo cu Caribe a keda semper fuerte y caluroso. Nos tabata bai hopi biaha pa bishita famia. Mi mama a traha pa binti aña como mentor di e Stichting Studiefinanciering Corsou, orientando becadonan cu tabata bin Hulanda pa studia. Asina bo ta mira di cerca con studentnan por pasa momentonan dificil aki, leu di cas, cu cultura diferente y idioma hulandes.”  

Ora nan a bisa Heera con e a yega den politica, e respuesta a sorprende: “Via un competencia di modelahe. Mi historia tocante ken mi ta y con ta crece na Hulanda como un mucha muhe di color, mi a comparti riba social media. Un amigo di scol di antes a bisa mi cu mi mester drenta politica. Mi no tabata entusiasma directo, pero mi a pensa riba dje. Pa eleccion di conseho municipal di 2022 mi a yena un formulario di aplicacion. Mi ta kere cu educacion ta super importante, pesey D66 tabata e escoho logico pa mi.”   E originalmente tabata na e 11e posision, cu tabata imposible pa logra, pero e miembro di partido a vota pa subi e na e 8e posision. Prome cu e eleccionnan, dos candidato a retira, y esey a pone e na e 6e posision. D66 a gana un asiento mas na Delft (di 5 pa 6), asina e a drenta den conseho municipal.  

Ora e gabinete a cay e zomer aki, tabata e mes amigo di scol cu a anim’e pa pone su candidatura pa e Tweede Kamer. Despues di entrevista cu e comision di seleccion y eventualmente cu lider di partido Rob Jetten, e a ricibi un luga relativamente halto – e 18e – pero na moment ey tabata sin mucha chens. “Mi wela semper tabata bisa: bo nunca sa con un paharito ta bula.” E tabata planea pa hasi un campaña fuerte cu sosten di su mama. “Pero dia 26 di augustus mi mama a fayece, y mi a pausa  mi campaña” 

E fayecimento inespera di su mama a pone Heera pensa mas profundo riba su raiznan. “Hende ta yama mi yiu di Corsou, pero mi tabata duda si mi ta un berdadero yiu di Corsou. Mi no ta papia Papiamento. Te ora mi a descubri cu hopi di e hungadornan di e seleccion di Corsou, mescos cu mi, a nace na Hulanda pero ta hunga pa e isla cu un pasion tremendo. E momento ey mi a sinti esey mes: mi tin e mesun pasion, mi ta orguyoso di Corsou.”  

Heera ta enfatisa cu si e bira miembro di parlamento, e kier representa tur seis isla caribense. “Pa motibo di lazo familiar, probablemente mi sa mas di Corsou y Aruba cu di e otro islanan, pero mi a cuminsa forma contacto den diferente lugarnan y tin fuente cu ta duna mi hopi informacion. Mi ta habri, mi kier siña y mi kier sa tur cos. Mi ta lesa hopi material, asina cu mi ta contento cu bo a duna mi un ehemplar di e publicacion tocante diesinco aña di Caribe Hulandes. Mi a caba cuminsa lesa e version digital ya. Mi ta mira cu tin hopi cos pa mehora na islanan BES. O, y mi lo tuma un curso di Papiamento pronto, sigur.”  

E la pone un condicion: “No ta garantisa cu mi lo haya e cartera di Relacionnan di Reino. Den mi entrevista di aplicacion mi a bisa cu mi kier e area ey hopi, pero ta e fraccion nobo ta esun cu ta dividi e portafolionan. Naturalmente lo ta fantastico si mi por representa e islanan si mi bira miembro di parlamento.”  

Den su bida diario, Heera – mama di dos – ta docente di Professional Skills pa e carrera HBO-ICT na Haagse Hogeschool. Educacion ta su pasion: “No tur mucho ta haya bon orientacion na cas of ta wordo mira den scol. Esaki ta crea desigualdad di oportunidad. Mi ke cu tur mucho haya e mesun oportunidad den educacion. Eso no ta pasa awor; e lugar caminda bo ta nace y crece ta determina gran parti di bo futuro. Esaki mes ta un di e motibonan pa cual mi ta sinti mi na su luga den D66.”

CANDIDATONAN CARIBENSE  

Pa eleccionnan di otro siman tin mas candidatonan cu fondo caribense, pero nan partido a pone nan na e parti mas abou di e lista: Erica Wever (14/SP), Glenn Helberg (22/Bij1), Henco Cecilia (24/ChristenUnie) y Simone Richardson (32/VVD). Si D66 haya menos cu 18 asiento, Heera Dijk ainda tin un posibilidad razonabel pa drenta den parlamento, pasobra candidatonan mas ariba den lista lo pasa pa un gabinete nobo. 

Articulo reproducii cu permiso su su autor Rene Zwart