Atravez di WhatsApp: Con Corsou a perde control riba miyonan di impuesto

WILLEMSTAD - E hefe di Departamento di Impuesto di Corsou, Alfonso Trona, durante hopi aña a tuma accion personalmente den coleccion di impuesto y den arreglonan di pago. E ta haci esey fuera di tur control interno. Asina un raportahe riba e portal di noticia hulandes NOS ta raporta awe.  Segun un control, e articulo ta sigui bisa, su manera di traha (di Trona:red) a causa bentahanan pa diferente contribuyentenan na e isla, incluyendo alto funciorionan publico y politico.  E reportenan cu a comproba esey a ser manda pa Ministro di Finansa Javier Silvania na parlamento dia 25 di maart 2024, pero no a bira publico. E reportenan ta na posesion di NOS.

PETICION VIA WHATSAPP  

E reportenan ta describe con Trona, e hefe di e departamento cu ta cobra impuesto, regularmente mes a dicidi ken ta haya o no haya un arreglo. Den decenan di expediente atrasonan a wordo limpia o aprobacion a wordo duna cu terminos di pago hopi flexibel. Den otro caso, a paga adelantamento riba declaracionnan cu ainda no tabatin establece o riba reembolso, a beses na funciorionan o (ex)politiconan, sin peticion of calculacion skibi. Segun e servicio di control Stichting Overheidsaccountants Bureau (SOAB), peticionnan asina tabata yega “telefonicamente of via WhatsApp”.  

ALFONSO TRONA  

“E audit report ta mustra claramente cu tabatin trato preferencial pa cierto contribuyentenan,” ex-ministro Silvania a skibi na maart aña pasa pa parlamento. Trona a defende su actuacion bisa cu e a actua den su competencia. Pero mes na es punto, e auditor di gobierno a conclui cu e no a sigui e regla y cu e no a documenta su intervencion. Segun SOAB esey ta “contra ley y reglamento”.  

“MAATWERK”  

E controlnan y e correspondencia ministerial ta mustra cu Trona a ignora e regla formal pa coleccion y a tuma e desicionnan riba su mes. E mes personalmente a decidi cua compania o persona ta haya arreglo di pago y bao cua condicion. Bao su liderazgo, departamento di controlnan a wordo pone banda: cobradornan a ricibi orden verbal pa para embargo o pa cambia acuerdo sin instruccion skibi. Segun e ministerio, esey a crea un paralisis interno den e servicio.   Trona a defende su actuacion cu argumento cu e ley ta duna espacio pa “casonan special.” E auditornan ta reconoce cu tin “un cierto poder discrecional,” pero e ta agrega cu esey “no ta sin limite” y cu cada desvio mester ta motiva y controla por escrito.  Den reunion interno, Trona a referi tambe na un supuesto “caha”: un map interno den cual tabatin acuerdo “personal” of “sensitivo,” solamente pa e mes por mira. Empleadonan a confirma cu cierto acuerdonan nunca a wordo registra digitalmente, causa cu despues no tabata posibel sa ken a haya cuantu beneficio.  

EJEMPLO: FLORIDA EXPRESS  

Un di e expediente cu e agencia di noticia hulandes NOS tin ta di Florida Express NV, un compania cu Aduana a multa pa declaracion di importacion incorecto. E debe original tabata di mas o menos 2.2 miyon euro. Despues cu Aduana a baha e multa —un desicion cu ta cay den nan propio autoridad— Trona personalmente a firma un acuerdo nobo cu e compania: pago di 1425 euro pa luna, sin deposito ni interes.  Segun e auditor di gobierno, e arreglo ey “no ta legitimo,” pasobra no tin analisis di capacidad di pago ni motivacion skibi den e expediente. Cu un pago asina abou, e debe lo paga solamente despues di mas cu trinta aña. E controlnan ta documenta miyonan den arreglo, eliminacion di debe y adelantamento den cual Trona tabata directamente involucra. Probablemente esey ta solamente un parti chikito di e daño total, pasobra e auditor di gobierno a investiga mas o menos cien expediente, principalmente casonan di riesgo.  

DAÑO  

E muestra di control no ta representativo pa tur debe di impuesto. Pesey no ta conoci cuanto placa Corsou verdaderamente a perde, pero segun calculacion di NOS e cifra ta den e decenan di miyonan.  Loke si ta cla: den ningun di e expediente investiga no a wordo haya motivacion ni calculacion, asina cu e legalidad di hopi pago no por wordo verifica mas.  

KANTOOR DI DEPARTAMENTO DI IMPUESTO NA CORSOU   

E Departamento di Impuesto di Corsou ta consisti di dos parti: e Inspectie, cu ta impone impuesto, y e Landsontvanger, cu ta cobra nan. Ta precisamente den es ultimo servicio cu poder a concentra bou Trona. Aunke parlamento a ricibi e documentonan aña pasa, no a tin discusion publico. Silvania a renuncia siman pasa como ministro despues cu un grabacion di un discusion fuerte entre dje y Trona a sali den media.   Den e grabacion ey, nan ta acusa otro di corrupcion. Por tende Trona defende su mes mencionando “e caha cu solamente e ta conoci.” Esaki ta crea e sospecha cu e Landsontvanger tin documento cu por pone otro hende den un luz negativo.  

EX-MINISTRO DI FINANSA JAVIER SILVANIA   

E caso ta pone na cla con e gobierno di Corsou a perde bista riba miyonan di impuesto. Mientras cu e gobierno internamente ta papia di “descubrimentonan chocante,” pa pueblo ta keda desconocido kico tabata pasando den e oficina di e cobrador y cuanto placa Corsou realmente a perde pa motibo di esey.

Cortesia di Dick Drayer  corresponsal di Region Caribense pa NOS