Ex presidente frances Sarkozy a cuminsa cumpli pena den prizon: “Mi ta inocente”

PARIS - Bou acompañamento di un gran columna di policia atraves di Paris, ex presidente frances Nicolas Sarkozy a wordo hiba pa prizon ‘La Sante’. E ex-presidente frances mester pasa cinco aña di prizon.   Prome cu e columna a sali, Sarkozy a sali for di su cas man cu man teni cu su esposa Carla Bruni. Un grupo di siguidornan loyal a core grita “Nicolas, Nicolas” y a canta e himno nacional frances.  Den un mensahe riba X, Sarkozy a mustra su banda mas rebel:  “Mi ta sigui denuncia e escandalo huridico aki, e prueba cu mi ta pasa ya mas cu 10 aña,” e ex-presidente a skibi, cu bisa cu su pensamento ta cu “tur frances di tur rango y opinion.”  “Mi ke bisa nan cu tur mi fuerza cu no ta un ex-presidente di Republica cu ta ser sera awe mainta, sino un homber inocente.”  

ORGANIZACION CRIMINAL  

E condena di Sarkozy ta un capitulo mas den e lucha huridico largo tocante acusacionnan cu su campaña di 2007 a ricibi miyonan di efectivo for di lider libiano ‘Kadhafi’, cu despues a wordo kita for poder y mata durante e rebelionnan di Primavera Arabe.  Sarkozy a wordo declara culpabel di participacion den un organizacion criminal. E huez a libera dje di otro acusacionnan, manera corrupcion, malversacion di placa publico y financiamiento ilegal di campaña electoral.