Companianan di avion na Merca por registra pasahero solamente como homber of muher

NEW YORK - Compañianan di aviacion na Merca no por usa e simbolo neutral di genero ‘X’ mas pa pasahero internacional. Desde e luna aki, nan mester registra den documento di biaha si un persona ta homber (M) of muher (F).  Na Merca, e simbolo ‘X’ pa hende cu no ta sinti nan mes homber ni muher a wordo permiti den pasaporte desde 2022. Pero desde awor, esnan cu tin ‘X’ den nan pasaporte of e empleado na balie ora di check-in mester cambia e  simbolo pa ‘M’ (male) of ‘F’ (female).   Aduana mercano a introduci e regla aki dia 14 di juli, pero a duna companianan di avion tres luna di tempo pa implementa e cambio. E periodo di transicion a caba awor.  

SISTEMA NO TA ACEPTA ‘X’

Pa awor e ta trata solamente di un proceso administrativo, y no tin restriccionnan riba posibilidad pa biaha pa hende cu tin ‘X’ den nan pasaporte. Pero e sistema no ta acepta e opcion ‘X’ mas ora di check-in. E regla ta aplica pa vuelo di y pa Merca, no pa vuelo domestico.  

TRUMP  

E medida aki ta parti di e lucha di presidente mercano Trump contra tur loke tin relacion cu diversidad. Durante su campaña, Trump ya tabata bisa cu e lo pone fin na e idea ‘woke’. Pasaportenan cu ‘X’ ta sigui balido te nan fecha di vencemento. Segun **New York Times**, apesar di e declaracionnan di Trump, ainda no ta cla si e cambio lo afeca pasaportenan nobo ora e renovacion yega.