Segun METEO di Aruba,'region local' ta spera awacero pisa cu lamper y strena

ORANJESTAD – “ Un ola tropical fuerte, moviendo bastante rapido den parti oost di lama caribe, lo trece basta weer den region local durante proximo 24 pa 36 ora” Esaki tabata e mensahe di Meteo di Aruba diadomingo anochi. Segun e pronostico, ‘ esaki ta inclui awacero pisa cu lamper y strena cu lo bai hasi lama temporalmente bruto, especialmente na partinan  oost te noordwest di area di costa, caminda olanan por yega 6 te 8 pia’, e mensahe tabata bisa.

AVISO PA BOTO

Aparte di esey, a emiti un aviso pa boto chikito cu lo drenta na vigor dialuna mainta 6'or. Esaki especialmente pa partinan oost te noordwest di costa. Adicionalmente tambe ta pidi ocupantenan di boto chikito pa no aventura den areanan cu awacero pisa y lamper cu strena. “Tambe ta pidi usuarionan di lama pa tene esaki na cuenta”.

OLA TROPICAL

Mientrastanto, National Hurricane Center na Miami, a aumenta e chens pa e ola tropical cu tabata pa drenta Caribe e siman aki, na 40% di posibilidad pa bira un depresion tropical, aunke ta mustra cu si e sistema keda cu e forza, cu esaki lo ta den careda di mitar pa fin di e siman aki. Pues den careda di diaranson pa diahuebs. Pero, for di dialuna, por a cuminsa sinti e efectonan caba, cu ta awacero y tambe laman bruto.