Merca ta mustra forsa cu bombarderonan B-52 riba Laman Caribe

WASHINGTON – Menos cu 24 ora despues di un atake mortal di Merca riba un barco cerca di costa di Venezuela, awe dos bombarderon strategico B-52 a wordo mira riba Laman Caribe. E avionnan a bula durante oranan largo sincronisa den norte di Venezuela, un maniobra cu segun observadornan di aviacion ta un señal cla di poder militar.

E avionnan a sali for di Shreveport, den estado mericano di Louisiana, y a wordo sigui riba radar di buelo pa milenanan di usuario. Segun observadornan di aviacion ADM Spotter Aruba, e bombarderonan “tabata bula casi uno riba otro y siguiendo ruta identico.” E observacion aki a wordo confirma pa varios tracker internacional di aviacion.

E forza aerea mericano ta usa avionnan tipo B-52 normalmente pa patrullanan di distancia largo of como demostracion visible di poder den area di tension geopolitico.

UN SITUACION HOPI NO COMUN

E buelo riba region Caribe ta un suceso hopi no comun y ta sigui despues di un incidente di diamars anochi, ora Estados Unidos supuestamente a destrui un barco cu segun Washington tabata ocupa cu “actividad terrorista of criminal” cerca di costa di Venezuela. Segun medio local, algun persona riba e barco a perde bida.

Gobierno di Venezuela ainda no a reacciona oficialmente riba presencia di e bombarderonan mericano. Tambe e Comando zuid di Merca (SOUTHCOM), cu ta dirigi operacionnan militar den region, no a duna ningun declaracion.

E relacion entre Washington y Caracas a empeora mas durante e ultimo lunanan. Uso di avionnan strategico riba Laman Caribe ta wordo mira pa analistanan como un advertencia pa presidente Nicolas Maduro, den un periodo cu Venezuela ta atrae atencion internacional atrobe debido na tension interno y conflicto fronterizo.