Na Corsou, RST a cuminza cu investigacion Silvania/Trona

WILLEMSTAD – Manera EXTRA a informa diamars mainta, ex minister Javier Silvania a limpia su oficina y a bay RST. E echo cu el a limpia su oficina a sali cla ayera ora el a tuma su retiro como minister y ta drenta awor como parlamentario pa MFK. Kico el a bay hasi RST ta keda cologa. EXTRA a tuma contacto cu bosero di Ministerio Publico señor Gouverneur, y el a informa cu el no por ni confirma ni desmenti e informacion di posible investigacion. Segun fuentenan hudicial di EXTRA, ya Trona y Silvania lo a bay Landsrecherche. Kisas nan a bay haci denuncia of a keda yama. Pero e echo ta cu cerca di RST no por bai pone un denuncia pero si bai duna declaracion.

RST, manera a splica ayera, ta traha hunto cu OM, polis y tambe polis Hulandes, por yama personanan cu ta keda investiga sea como sospechoso of testigo pa duna declaracion. Den e caso aki te ainda e contenido di e investigacion ta cologa den laira.

Javier Silvania a tuma su retiro ayera como minister, pero su partido no a informa e motibo di su retiro. Ta simplemente speculacion y sospecho tin cu ta debi na e grabacion cu a bai rond di akusacionnan entre Trona (Ontvanger) y Silvania (minister) di froude y corrupcion. Pero den e caso aki no a informa tin e motibo dikon e retiro di Silvania. Mientrastanto tin un investigacion cu por dura hopi largo prome cu kisas algo sali cla. Kisas den e reunion publico di mañan, ora kisas Trona haña dispensacion pa papia, algu lo keda aclara. E echo ta cu nunca anterior pueblo a keda biba den asina tanto duda sin cu e partido concerni, den e caso aki MFK, sali y bisa kico ta motibunan di retiro di un miembro di dje.