Na Corsou, minister Charles Cooper ta haya cartera di finansa

WILLEMSTAD – Charles Cooper, minister encarga actual cu VVRP, lo haya tambe e cartera di finansa bou di dje. Ayera, prome minister Pisas a anuncia cu Cooper ta e reemplasante temporal di finansa. Segun un analisis, tumando na cuenta cu Charles Cooper den e gobierno anterior a ocupa e cartera di finansa temporalmente ora cu minister Silvania no tabata presente, e analisis ta indica cu e lo haya e cartera di finansa di forma regular tambe. Ayera, manera a anticipa for di un dia anterior ora cu el a limpia su oficina, Javier Silvania a bay entrega su retiro cerca di gobernador. Mañan diabierne tin un reunion publico yama relaciona cu e grabacion cu a bai rond di fraude, corrupcion y hopi mas entre Silvania y Trona. Oposicion a pidi reunion y mañan e reunion lo tuma lugar. Tabata premira cu den e reunion lo a presenta mocion di desconfiansa contra di Silvania. Sinembargo, ayera den oranan di merdia el a tuma su retiro. Pa medio di abogado señor Braam, directiva di Movemento Futuro Corsou a saca un declaracion cu ta bisa e siguiente:

Acuerdo entre Directiva di MFK y señor Drs. Javier Silvania

Directiva di MFK y minister Javier Silvania a yega na un entendimiento mutuo pa trece trankilidad cerca di pueblo di Corsou, pero tambe pa duna espacio na e investigacion cu ta tuma lugar.

Entrante 15 di october Javier Silvania a entrega su retiro como minister di finansa y salubridad.

Directiva di MFK ta gradicido pa e trabou cu minister Silvania a ehecuta como minister di finansa y salubridad.

Miembro di Parlamento señor Tyron Boekhoudt lo entrega su retiro pa crea espacio pa Javier Silvania por drenta Parlamento y forma parti integral di e fraccion di MFK.

 "Cu e comunicado aki ta cla un etapa y partidonan lo no duna mas declaracion na prensa", segun e comunicado di abogado señor Bertie Braam.

For di declaracion di prome minister Pisas, prome cu señor Silvania a entrega su retiro como minister, el a bisa cu e lo tuma e cartera di GMN kompleto temporalmente y Charles Cooper esun di finansa. Sinembargo, tur cos ta indica cu e cartera di finansa lo bai di forma regular pa Charles Cooper. E lo tin e ora ei VVRP y Finansa.