Pa fin di aña tin claridad ki tipo di prizon nobo Aruba ta bay haya

ORANJESTAD – Pa fin di aña mester tin claridad ki tipo di prizon Aruba ta bay haya, cu lo keda ubica na Barcadera. Asina minister di husticia Arthur Dowers a bisa Noticiacla e siman aki. Expertonan ta trahando un plan final pa con e prizon nobo di Aruba mester bira. E expertonan aki ta di e.o. Nacionan Uni y tambe di ministerionan di Hulanda, cu ta haciendo un ‘otro’ evaluacion, pa con e prizon nobo ta bay ta. E mandatario kier pa esaki keda cla rapido, y no dura 6 pa 7 aña. Esaki pasobra e prizon actual no ta wanta tanto tempo mas. 

A HACI EHERCICIO CABA

Como cu a haci varios ehercicio caba den pasado, y e echo cu tabatin un plan pa traha un prizon nobo caba, por keda cla cu e Proyecto aki relativamente lihe y pa tin un conclusion di ki tipo di prizon Aruba lo bay tin proximamente. 

DETAYES

E plan mester bisa cuanto prezo e prizon por wanta, cantidad di cel cu mester, e tipo di cel, y varios cos mas cu ta pone cu nos ta cumpli tambe internacionalmente cu e reglanan. Unabez cu tur e puntonan ey ta determina, ta cuminsa cu e proceso di pinta e mapa di e prizon. “Pa fin di aña mester tin claridad kico e proyecto ta bay houd in”. Esey ta ensera tambe ki tempo lo cuminsa cu e construccion, cu lo dura sigur un par di aña. 

BARCADERA

Te na e momento aki, e prizon su ubicacion ta na Barcadera, segun proyeccion. Unda exactamente ta den besindario di algun compania existente manera esun di beton, na otro banda di caminda.