Demandanan entre 20 luna te cu 10 aña di prizon pa ex trahadonan Wardacosta

WILLEMSTAD.– Fiscal a haci demanda ayera entre 20 luna te cu 10 aña di castigo di prizon pa siete acusado den e caso di ex trahadonan di Wardacosta, cu a haya e nomber Heelal. Ta trata di e acusadonan Darrelson V. cu a keda demanda na 10 aña di prizon, Charlton K. cu a keda demanda na 7 aña, Djusoa E. na 4 aña di prizon, Anthony C. na 36 luna di cual 6 condicional, Shair L. na 34 luna di cual 6 condicional y Selanyo P. na 20 luna di cual 6 condicional.

Tur siete ta keda acusa di ta involucra den organizacionnan criminal, caminda nan lo mester tabata duna criminalnan informacionnan secreto di Wardacosta pa facilita cargamentonan grandi di droga pa pasa yega Corsou. Fiscal a bisa cu ta trata di un caso lamentabel caminda trahadonan di Wardacosta a haci mal uzo di nan funcion, siendo cu nan a huramenta pa ta esnan cu lo mester evita traficacion di droga den nos awanan teritorial y contrari na esaki, nan tabata aporta y facilita organizacionnan criminal pa trece droga na gran escala den nos territorio.

Banda di esaki nan tabata haya salarionan cu ta bin di impuesto cu comunidad ta paga pa cuida nos di tipo di traficacionnan asina aki.

Segun fiscal esaki ta duna un impresion cu algo tabata bayendo completamente robes cu e mucha hombernan aki. Fiscal a bisa cu nan tabata participe na organizacionnan criminal, sabiendo con droga por destrui henter un comunidad. Fiscal a bisa cu e acusacionnan por keda proba. Mirando nan funcionan y tambe rol di cada uno, Ministerio Publico ta tuma nan hopi na malu nan actonan. Tur esakinan ta pone cu fiscal ta yega na demandanan halto di castigo pa e acusadonan.

Ta trata di amtenarnan cu a scohe pa sirbi nan comunidad y tabata polis di laman cu pais a spera cu nan lo a traha integro y no bay involucra nan mes cu rednan criminal.