OM: Polis no ta haci investigacion tocante mas menasanan contra Wilders

AMSTERDAM - Polis na Hulanda na e momento aki no ta haci investigacion tocante ningun menasa nobo dirigi na Geert Wilders. Esaki a wordo confirma pa e Ministerio Publico. Polis y Ministerio Publico no ta mira indicacion di un menasa adicional contra e lider di PVV. Geert Wilders a suspende su campaña electoral pa tempo indefinido diamars pasa, despues di un posibel menasa for di Belgica.

Un cel terrorista belga, cu supuestamente tabata plania pa haci un ataque contra e promer ministro belga De Wever,  tambe  tabata menciona Wilders como un posibel blanco. Wilders a bisa riba X cu e Coordinador Nacional pa Combate di Terrorismo y Seguridad (NCTV) a confirma esaki na dje. Dos hoven for di Antwerpen ta deteni bou di sospecho di intento di asesinato terrorista contra e promer ministro belga. NCTV a bisa cu no tabatin ningun “menasa residual,” segun Wilders. E lider di PVV a cancela su participacion den e debate electoral di NOS riba NPO Radio 1 y tambe den e debate di television di RTL. Alternativanan, manera participacion via telefono of video, e tambe a rechasa.

Riba 23 di october ta programa e debate di SBS, y riba 28 di october, un dia prome di e eleccion, ta programa varios debate na NOS. No ta conoce ainda si Wilders lo ta presente den esey.