Hungadonan a convence entrenador nacional Advocaat: no kita e alma Caribeño for di Corsou

WILLEMSTAD - E hungadonan di seleccion di futbol di Corsou, cantando y bailando, a bira viral riba social media despues di e victoria sorprendente contra Jamaica e fin di siman pasa. E isla ta completamente entrega na nan soño di Mundial. “Esaki ta algo cu bo normalmente pasa un bez den bo bida.” Capitan Leandro Bacuna a guia e fiesta   di diabierna, cu movimiento suave el a dirigi e baile di victoria di Corsou. Pero lihe e ex-hungado di Aston Villa y FC Groningen a pone su mente bek na e obhetivo. E lucha pa e lugar pa Mundial ainda ta leu pa completa, el a repiti na su compañeronan di team. “Si nos perde punto contra Trinidad and Tobago, e victoria contra Jamaica no ta bal niun cos. Nos por hari, grita y canta, pero finalmente e ta trata di e siguiente wega,” segun Bacuna.

Corsou a tuma e liderazgo den su grupo despues di e victoria y tin tur oportunidad den su man mes pa logra e milagro deportivo antiano. E Stadion Ergilio Hato na Willemstad ta completamente bendi pa e wega di diamars anochi, cu 10.000 hende riba e tribuna. Esaki ta un contraste grandi cu e fase di comienzo di e clasificacion den juni 2024, ora e seleccion di entrenador nacional Dick Advocaat tabata hunga solamente dilanti di 4.000 persona.

E isla henter a adopta e team den su curazon. “Bo por sinti den e pueblo riba caya cu e fe den e Mundial ta crece,” Bacuna a bisa. “Esaki ta e oportunidad, nos por logra esaki di verdad. Pero nos mester haci e trabou. Mi ta sinti hopi felis pa e pueblo aki.” Segun Bacuna di 34 aña, e union y espirito di e grupo ta un di e arma mas fuerte di e seleccion di Corsou. Nan ta come hunto den restaurante normal, entre e pueblo, canta y baila den bus habri y pasa bon tempo hunto. “Nos tin un grupo hopi uni, nos ta realmente un gran famia.”