No a dicidi si ex docter di Michael Jackson por traha na Aruba

ORANJESTAD – Gobierno di Aruba ainda no a tuma decision si ta duna e docter di e fayecido artista Micheal Jackson, -esta Conrad Murray- permiso pa traha na Aruba. “Ningun decision a cay ainda” tabata e contesta riba e pregunta di e status. E departamentonan concerni no a conseha e ministerio responsabel pa duna e permiso ainda, e contesta final. Y tanten cu esaki no sosode, gobierno no por tuma e decision final. E hecho ta keda, cu e posibilidad ta keda ‘habri’. A compronde cu no a keda cla cu e investigacion ainda, y cu esey ta tardando e decision.

CONSTERNACION

Tabata algun luna atras cu NoticiaCla.com a trece e primicia aki, y cu mes momento a causa un consternacion den comunidad di Aruba. E informacion inicial tabata cu via un docter local na Aruba, a haci e peticion formal pa e persona aki establece su mes na Aruba como sosten pa e medico local aki. E decision cu mester wordo tuma, ta basa riba e situacion ‘legal’ di e medico mericano basa riba su caso hudicial.

CASO MICHAEL JACKSON

Manera ta conoci, Murray a haya su mes envolvi den un caso penal na september di 2011, ora cu e mester a presenta den corte, acusa di homicidio involuntario, pa a causa morto di Jackson dia 25 di juni 2009. Murray a wordo haya culpabel na 2011 mes, y sentencia pa 4 aña di prison. Pero apenas 2 aña despues na 2013 a lague den libertad pa motibo cu prison tabata yen, y e la ‘comporta su mes bon’. For di Associated Press, tin informacion cu e licencia di docter di Murray ta ‘suspendi’ den tres estado unda cu e la yega di traha como docter. Sinembargo, esey no ta nifica cu e suspension aki ta conta pa exterior tambe. Esey ta loke cu oficialnan di gobierno (cu tin cu aproba su peticion) ta averiguando aworaki, prome cu e decision final cay.