KB riba mesa pa ministerio di dos minister di Aruba

ORANJESTAD – Mientras cu tur wowo ta riba un posibel Maatregel van RijksBestuur pa gobierno di Aruba relaciona cu finanzas publico, NoticiaCla.com tin di su fuentenan fidedigno, cu tin dos Koninklijk Besluit (KB) riba mesa pa ministerio di dos minister na Aruba. E prome KB ta pa e ministerio di permiso, cu ta cay bow di minister Benny Sevinger, relaciona cu asunto di visa. Pa varios luna Hulanda lo ta vigilando e situacion, y Hulanda lo no ta nada contento cu e proceso cu e mandatario ta hibando. Proximamente lo dicidi si enberdad ta sigui cu e plan pa duna e ministerio e KB, basa riba e proximo ‘intercambio di informacion’. Oficialmente, no a bin reaccion ainda di parti di gobierno di Hulanda riba e asunto aki. 

MAS PIO CU LAFT Y CAFT

For di basta tempo caba NoticiaCla.com ta trahando riba e informacion aki, acumulando informacion. For di fuentenan serca di e caso, a compronde cu e KB aki ta mas pio cu e asunto di CAFT y LAFT. “E ta mucho mas grandi cu AFT” e fuentenan a bisa NoticiaCla.com. Esaki pasobra e embergadura di e problema ta mucho mas grandi. Y no solamente un KB, pero tambe un investigacion rigoroso di Hulanda den e ministerio di e mandatario y su departamentonan.

KB PA OM

E otro KB, segun informacion cu NoticiaCla.com tin, lo ta pa Ministerio Publico, cu ta cay bou di minister di husticia Arthur Dowers. Aki tambe tin informacion cu Hulanda lo no ta contento cu e desaroyo y cu aki tambe cos lo no ta bayendo bon. Informacion cu NoticiaCla.com tin, ta cu posiblemente lo trece un PG nobo pa Aruba, y manera cu a sosode na St Maarten, lo tuma e ministerio publico over pa un periodo, y revisa un cantidad di caso cu lo no ta canando bon. Manera cu a sosode na St Maarten algun luna pasa, Hulanda a dicidi di pone un KB pa e parti ey tambe y manda un cantidad di personal hulandes pa dirigi e departamento ey y drecha loke mester tin di drecha.