Shoco Garden di Marriott Aruba a keda inaugura

ORANJESTAD - Diaranson mainta, Prome Minister mr. Mike Eman, a asisti na  apertura di Shoco Garden cu ta un iniciativa di Marriott hunto cu Aruba Birdlife Conservation. 

Prome Minister a expresa su gratitud na Marriott pa nan esfuerso pa logra e meta grandi cu Gobierno a pone pa inclui cada aspecto cu ta haci Aruba unico, mei mei di tur e desaroyo cu ta tumando luga. Nos naturalesa ta forma parti crucial di esaki y cada esfuerso cu haci na beneficio di nos naturalesa, ta un stap mas cerca di e obhetivo. 

Marriott a demostra su compromiso door di crea un Shoco Garden riba nan propiedad caminda cu tin neishinan di shoco, pa cual Prome Minister Eman ta hopi agradecido. Ademas Prome Minister Eman a gradici Greg Peterson di Aruba Birdlife Conservation pa ta un pionero den e lucha pa proteccion di nos shoco y pa pone e shoco di Aruba riba mapa. 

Ta hopi importante cu sector priva ta adopta e concepto di con nos por convivi cu naturalesa y e responsabilidad pa conserva locual ta di nos y na unda por, hasta recupera locual a bay perdi caba.  

Gobierno, mientrastanto ta preparando pa un dialogo nacional cu e sector hotelero y ta spera cu pronto por trece tur partner hunto pa delinea e direccion den cual hunto nos kier cana y den cual prosperidad comparti ta central, mescos cu proteccion di naturalesa, pero tambe unda por acomoda aspiracionnan y ambicionnan di henter e pueblo pa comparti den e bienester di nos comunidad.