Na Corsou a detene chauffeur cu a causa morto den traficoo

WILLEMSTAD – Ayera nochi, algo pasa di 12 ora tabatin un accidente cu morto riba Caracasbaaiweg, caminda chauffeur di e auto cu a ocasiona e accidente a core bay. Polis sinembargo rapidamente a logra pone man riba dje. Polis ta informa cu ayera diaranson 7 di october pa casi cuater pasa di 12 di anochi, Central di Polis a ricibi informacion di un caso di accidente gravi cu a tuma luga riba Caracasbaaiweg, algo despues di e cruce cu Bronsweg den direccion ost. Na yegada di e prome unidad, nan a mira un homber herida drumi abou riba caya y cu ya no tabata duna señal di bida. For di investigacion preliminar a sali cla cu e victima a keda alcanse pa un vehiculo mesun momentu cu e tabata cruzando caya. Despues di e accidente, chauffeur di e vehiculo a continua su destinacion sin laga su identidad atras. Personal di ambulancia a yega na e sitio, pero no por a hasi nada mas pa e homber cu a sufri lesionnan serio a consecuencia di e accidente.

Doctor di polis cu tambe a keda notifica, a constata morto. Investigacion den e caso ta continua. Identificacion di e victima y detencion di e sospechoso. E victima cu a fayece debi na e accidente cu a tuma luga riba Caracasbaaiweg a keda identifica como Gabriel De Jesus Magdalena, nase na Corsou 5 di october 1988. Mientrastanto, mas despues polis a logra haña e persona cu tabata core e vehiculo y tambe e vehiculo mes. Polis ta informa cu den cacho di cuater pa cinco di despues a wordo realisa un detencion. Despues di investigacion y informacion di publico cu a drenta na polis, personal di Departamento di Trafico a detene e homber A.S., di 22 aña di edat, nace na Corsou. Su detencion a tuma luga na un adres den Patiaweg. Na e cas ei a wordo confisca tambe e vehiculo cu tabata envolvi den e accidente. A presenta e sospechoso dilanti di un fiscal ouxiliar cu a ordena su encarcelamento pendiente di mas investigacion.

Loke por constata ora mira e daño na e auto envolvi y tambe kon e victima a keda despues di e choque, e vehiculo tabata corriendo cu un velocidad basta halto. Tin papia cu el a bai kita pa un otro vehiculo y a dal e peaton, pero e pregunta ta con duro e tabata core cu e no por a wanta na tempo pa e otro vehiculo. Tanto e windshield di e auto como bumper, wantalodo y tapa di machin a kibra, esaki debi na e sla ora el a dal un hende, den e caso aki e peaton.