American Airlines ta bin cu metodo nobo pa control di maletin di man

MIAMI - American Airlines ta cambia e manera cu e ta controla maletin di man na porta di embarque. E aerolinea mericano ke hasi e proceso di subi abordo mas eficiente y lo laga pa usa e marco tradicional pa midi maletin na e porta. E regla pa tamaño di maletin di man ta keda mesun cos. E cambio, cu ta den vigor desde 6 di october, ta nifica cu pasaheronan ya no ta obliga pa pone nan maletin den e rek metalico pa mira si e ta pas den e tamaño permiti. E empleadonan na porta di embarque lo usa nan propio juicio pa determina si e maletin ta den tamaño corecto. No ta conoci si ta aplica e regla aki na Aruba tambe. American Airlines ta bula dos biaha pa dia pa Aruba, for di Miami y Charlotte. 

TAMAÑO ACTUAL TA KEDA NA VIGOR

E aerolinea ta enfatisa cu e regla actual pa maletin di man ta keda den vigor. Pasaheronan por carga un solo maletin di man y un solo articulo personal riba avion. E articulo personal mester cabi bou di e sea di pasahero y no por ta mas grandi cu 45 x 35 x 20 cm. E maletin di man por wordo pone bou di e sea of den e rek pa maleta. E tamaño total di e maletin di man, incluyendo nan manibel y wielen, no por ta mas grandi cu 56 x 35 x 23 cm.

PA ACELERA E PROCESO DI SUBI ABORDO

E adaptacion aki ta sigui e esfuersonan anterior di American Airlines pa simplifica e proceso di embarque. Asina, e aerolinea a introduce un sistema tecnologico cu ta controla automaticamente si e pasahero ta bay subi den e grupo corecto. Cu e medida aki, American ta spera pa reduci atraso durante e embarque y pa mehora e experiencia general di biahe.