Eerste Kamer ta aproba ley pa proteccion contra discriminacion na islanan BES

DEN HAAG – Eerste Kamer a aproba dia 7 di october 2025 e introduccion di ley di trato igual pa Boneiru, Sint Eustatius y Saba. Cu esaki, e Ley di Proteccion contra Discriminacion na e islanan aki a wordo oficialmente aproba.

Basa riba articulo 1 di Constitucion Hulandes, na Hulanda Europeo tin diferente leynan cu ta garanti trato igual. Na Boneiru, Sint Eustatius y Saba, es leynan no tabata aplica te awor. Cu e ley nobo, e diferencia aki ta wordo elimina: e legislacion cu ta duna proteccion contra discriminacion lo aplica pa henter Hulanda.

Anteriormente investigacion a mustra cu e ley di trato igual ta importante pa e residente di Boneiru, Sint Eustatius y Saba. Awor cu e ley a wordo aproba, residente lo por haci uso di e ley si nan ta sinti cu nan ta wordo discrimina, por ehempel pa motibo di origen, religion, sexo of preferencia sexual. Pa es proposito nan lo haña acceso na un servicio anti-discriminacion (ADV), cu lo wordo coloca den e loket di ayuda legal gratis cu ta den preparacion riba cada isla. E loketnan aki lo tin persona cu conocimiento di e ley, cu lo registra quejanan di cuidadanonan, duna apoyo y ayuda pa determina paso siguiente.

E College voor de Rechten van de Mens tambe lo ricibi un tarea nobo riba Boneiru, Sint Eustatius y Saba. Esaki ta nifica cu cuidadanonan por presenta un peticion na e College pa evalua si den nan situacion ta tin caso di discriminacion.

Minister Rijkaart di Asuntunan di Interieur y Relacionnan di Reino a bisa: “Cu e ley aki tur habitantenan di nos pais lo ricibi mesun proteccion contra discriminacion. Y no solamente riba papel, pasobra cu e loketnan cu lo wordo habri, hende riba e islanan lo haña ayuda y sosten directo. Esaki ta importante: ningun persona no mester wordo exclui of trata desigual.”

E ley ta spera pa drenta na vigor oficialmente dia 1 di januari 2026.

Pa mas informacion tokante e ley, por wak e documentonan parlamentario correspondiente AKI