Minister Dowers a para reunion cu Otmar Oduber a yama riba seguridad

ORANJESTAD – Minister Arthur Dowers a para e reunion cu colega minister Otmar Oduber a yama riba ‘seguridad den zona turistico’, cu mester a tuma lugar diamars. Fuentenan serca di e ministerionan a confirma cu despues cu partidonan envolvi (ministerio publico y polis) a confirma nan presencia un dia anterior, minister Dowers a yama y ‘cancela’ e reunion, aunke e situacion real ta cu a ‘para’ esaki. Ademas Dowers lo a informa e dos departamentonan ey pa no bay e reunion ey. Di parti di polis tambe NoticiaCla.com a haya confirmacion cu e reunion enberdad a wordo ‘cancela’.

PAKICO CANCELA

For di diamars cu e reunion no a sigui, a cuminsa busca informacion pakico esaki diripiente a wordo cancela, mirando su urgencia. Pero e forma con ambos tabata anda cu e situacion, esta ‘referi na otro’, sin kier duna mas informacion, a pone cu a cuminsa investiga mas. Y poco poco e cuadro tabata bira mas cla.

LAMENTABLEMENTE

For di minister Oduber, e prome señal, tabata ora cu e la bisa ‘lamentablemente’, indicando cu e tabata for di su control y cu e ta lamenta cu e reunion no a tuma lugar. Na final, e la confirma cu ‘Dowers y polis a cancela’, y cu mester acudi serca nan pa informacion. Ora cu a acudi informalmente serca e ministerio di Dowers, a wordo bisa mesun cos, esta ‘bay puntra Oduber’.

MINISTER DISGUSTA

Ta te diaranson merdia cu e confirmacion a bin di dos diferente fuente, cu a confirma cu e paro a bin for di minister Dowers cu a ordena pa para e reunion, aunke e motibo oficial no ta conoci. Fuentenan sinembargo ta mustra cu Dowers no a gusta nada con su colega a ‘subi su tereno’ y yama un reunion riba un tereno cu ‘no ta concerni su cartera’. Esey a pone cu e la dicidi pa informa su colega cu e ta ‘cancela’ su participacion, y cune, esnan cu tambe mester ta parti manera polis y ministerio publico.

PAKICO A YAMA REUNION

Tabata dialuna cu minister di turismo Otmar Oduber a informa cu ta yama un reunion diamars merdia. Motibo ta cu gobierno ta sumamente precupa cu e seguridad den e area di e zona turistico na Palm Beach, manera e.o. South Beach Center unda cu tabatin e caso di agresion y tiro contra un taxista diadomingo. Como tal, mirando e seriedad di e situacion, a yama un reunion pa diamars merdia entre gobierno, KPA y ministerio publico pa atende e situacion y wak kico ‘extra’ por haci pa e remedia e situacion di seguridad.

AREA DI PRECUPACION

Segun Oduber, e situacion ta ‘carga’ su precupacion, sigur si mira cu e mescos e por a sosode cu un turista tambe. Y si esaki sosode, e por tin un efecto devastador pa nos turismo sigur. Pa loke ta e caso di e taxista cu a haya su mes den e asunto, Oduber a lamenta esaki hopi. E conoce e persona personalmente, y a nota cu no ta e prome taxista cu ta haye den problema asina. Den pasado tabatin un taxista dama agredi formalmente, y tabatin otro cu a haya nan mes continuamente cu problema den e area.

META DI REUNION

E meta di e reunion di diamars tabata pa wak kico ta tumando lugar na e momentonan aki, y con leu ta cu e proyecto di e.o. camara. Lo kier a wak con tin cu yuda cu fondo pa e tipo di proyectonan aki. A menciona tambe riba complementacion di fondo pa Aruba hospitality Security Foundation. E visibility team di antes tabatin fondo di entre otro 750 mil florin tur aña cu tabata sali for di e fondo di ATA. “Nos kier yuda pa coopera cu otro mas miho ainda, pa sigura cu e fondonan cu nos ta poniendo e momentonan aki, ta mas rendable y tin mas productividad”.